NASKAH KETHOPRAK "PANEWU SENGKUNI"

ADEGAN            :  SERAMBI KAPANEWON ( Introducing )

SWASANA         : KENCENG

IRINGAN            : ......................

PROPERTI         : TENGGOK – JANGANAN – PADI – PIKULAN –BUKU

PARAGA            : 1. PENEWU SENGKUNI

                               2. BEBAU SANDI KAPANEWONAN

                               3. TIYANG –TIYANG DUSUN

                               4. JURAGAN BRONO LUWIH

PANEWU SENGKUNI

(Lungguh nyambi udut kebal-kebul, nganggo crutu)

Urip kok ya ayeme ngene ya..ya.. he he he. Samu barang cemawis. Tangi turu, leyeh-leyeh ngopi karo udut. Kopine telek luwak, udute menak jinggo. Tambah jengking tambah jero. Huwahaha...
Esok kremun-kremun, wong-wong padha kemreyeg asok wulu wetu marang Panewu Sengkuni. (karo nuding awake dhewe). Minangka pangayomane kawula aneng kapanewon kene.
(rada lirih/ bisik-bisk) Keno dimanpaatke, bisa diakali. He..he..he.. (ngetokke culikane).

KATRANGAN   : a. Tiyang-tiyang dhusun sami asok glondhong pengarem-arem datheng Kapanewon. Sami bekta wuluwektu. Wonten ingkang dipun pikul ugi wonten ingkang dipun gendhong mawitenggok.

01.PENEWU SENGKUNI

(Kemaki sok kuwasa ) Heh ! ayo rene !klelat-klelet.

(Lajeng ngundang bebaunipun sepados nyatet. Kaliyan ngodhol-odhol isinipun bulu bekti ingkang dipunbekta tiyang-tiyang dusun)

Sandi ! iki ?!Dicatet ! ( kumawasa ) Iki apa iki?? Wulu wetu mengkene dhapure mbok asokke, rumangsamu nyicil kreditan ompreng apa piye??

(ganti mriksa sijine) Lha....ngene iki lho sing tak karepke. Cocok!!

Awake dhewe ki rak urip ana ing pangayomane Kadhipaten Medhang Miring. Mula awake dhewe anggone asok wulu wetu kuwi sing akeh marang negarane. Supaya tambah tentrem, saya makmur uripe. Lak ya ngono ta??

WARGA

Nggih..  

(Wangsulanipun tiyang dhusun semu ajrih)

Dhatengipun Juragan Brono luwih.

02. PENEWU SENGKUNI

(Grapyak – Semanak ) Weh,..... Mangga-mangga Jurugan..

Mboten sisah antri. Mangga,...mangga. ( Dhateng Sandi ) Diurusi.wong cilik-cilik iki.

(Dhateng Juraga Brono Luwih ) Mangga....mangga.....tindhak melbet kemawon.

Penewu Sengkuni lajeng ngejak juragan Brono Luwih.......Mojok.

DI BALIK LAYAR. SILUET. Ketingal Penewu sengkuni kaliyan Juragan Brono Luwih sami rembagan konspirasi rekayasa Glondhong pengarem-aremingkang kedah dipun unjukaken wonten ing Kadipaten.

ADEGAN            : KA 1. KABUPATEN MEDHANG MIRING

SWASANA         : AGUNG

IRINGAN           : AGUNG

PROPERTI        : BUAH-BUAHAN

PARAGA            : 1. BUPATI KANDHA MARUTA

                               2. PATIH MEGA MENDHUNG

                               3. PENEWU SENGKUNI

                               4. BEBAU SANDI

                               5. INDRAYANA

KATRANGAN   : a. Bupati diadhep para nayaka praja. Ngermbag perkawis kabupaten Medhang Miring. Ingkeng suda Wulu wekdalipun.

01.BUPATIKANDHA MARUTA

(Duka. Gebrak meja – Close, meja ) Piye... Wakne Sengkuni !

Wulu wektu Kabupaten saben sasi, saben tahun suda terus kuwi piye ?!

02.PENEWU SENGKUNI

( Nyembah ) Injih nyuwun pangapunten ndara Bupati... pancen tahun menika Kabupaten Medhang Miring nembe krisis...... Kula mesakaken kawula menawi kula peksa nglunasi bulu bekti....... Jalaran gesangipun injih nembe rekaos..

Ingkang kaluwihan bandha sami ndhablek. Ngemplang asok glondhong pengarem-arem wonten Kabupaten Medhang Miring.

03.BUPATI KANDHA MARUTA

Kok isa ?

04.PENEWU SENGKUNI

( Mantep – Cetha ) Mergi wonten konspirasi kaliyan nayaka praja Medhang Miring... Dados wonten gayusipun....Markus Bulu Bekti....

05.BUPATI KANDHA MARUTA

Sapa ?

06.PENEWU SENGKUNI

( Nyembah – alus ) Nyuwun pangapunten..... menawi  kepereng perkawis menika dipun rembag kanthi tertutup kemawon... Mboten terbuka.....

07.PATIH MEGA MENDHUNG

( Nyembah – Alus ) Nyuwun dalem sewu Kanjeng.... Kepareng kula nanggapi aturipun Penewu Sengkuni ?

08.ADIPATI KANDHA MARUTA

Yoh..... dak keparengake....

09.PATIHMEGA MENDHUNG

Dhi Penewu Sengkuni ?   Sliramu kuwi nek matur aja mung waton matur.?

Ning matura nganggo wewaton..... Sliramu kandha nek anggone para Sudagar ngemplang ora pasok bulu bekti kuwi ana sing Dombani.... Dalange nayaka praja Medhang Miring..... Bareng Ndara Bupati mundhut pirsa kowe matur nek perkara iki kudu kanthi tertutup.... Nek pancen aturmu kuwi akurat... Kena apa ora dibuka kanthi terang.... Ben kabeh nayaka praja mudhune kawula Mendhang Miring ngerti... Dadi kawula kuwi ora bingung......

10.PENEWUSENGKUNI

Lo,.... menawi kula matur cara blaka kula saget dipunwastani nglanggar kode etik ta..

11.PATIHMEGA MENDHUNG

Kowe mesthine ngerti pranatan ing kadhipaten Medhang Miring.... ?

Tumprap ukum kuwi ora mandhang sapa wae.... Nek pancen ukum kuwi ora mung diwaca, nanging dilaksanake....Yen sliramu mung nyebar kabar lamat-lamat kaya ngono kuwi tegese sliramu arep gawe bingung lan ngalihake perkara sing durung tinarbuka....

12.PENEWUSENGKUNI

Nyuwun sewu rekyana Patih Mega Mendhung...Penjenengan menika kok mesthi negatif thinking ta menawi kaliyan kula... kalenggahan njih inggil penjenengan ? Bandha njih mesthi kemawon,....?

13.PATIHMEGA MENDHUNG

(Cepet nyahut – Cetha ) Okeh kowe !

Merga sing cedhak karo para Sudagar kuwi kowe ? Hiya Ta ?

14.PENEWU SENGKUNI

( Cepet nyahut – kemaki ) Lo.... niku jenenge dakwa lo ? Napa nek kula celak kaliyan para sudagar niku mesthi trus sugih napa ? Umpama kula sugih niku rak nggih limrah ta ? Samben kula nggih kathah.... Kalih malih niku nandakke nek kula luwih dipercaya tinimbang pendhuwur kula.....

15.PATIHMEGA MENDHUNG

Pendhuwur sapa ? Aku apa ?!

16.PENEWU SENGKUNI

( Sakpenake ) La penjenengan rumaos dados pendhuwur kula menapa dede....?

17.BUPATI KANDHA MARUTA

( Wibawa – Cetha ) Wis...wis.... cukup !  Kok malah ngalor ngidul ora karuan.... sing bakal tak rembug kuwi ngenani asok sing saya medhun...saya medhun.. bulu bekti keng mlebu ana ing Kadhipaten...La nek pancen ana sing mbentengi para sudagar ngemplang anggone pasok bulu bekti kuwi sing perlu di usut....

18.PATIHMEGA MENDHUNG

(Nyembah ) Nyuwun pangapunten dalem Kanjeng. Awit ingkang beberaken perkawis ngemplanging para sudagar menika Penewu Sengkuni..

Ateges injih Penewu Sengkuni menika ingkang gadhah data ?

Pramila kula nyuwun perkawis menika dipunrembag kanthi terbuka... kajengipun kawula Dalem Medhang Miring saget ngertos.

19.BUPATI KANDHA MARUTA

Piye Penewu Sengkuni....?

                                

20.PENEWU SENGKUNI

Mangke menawi sampun titi wancinipun, temtu badhe kula bikak perkawis menika... nanging menawi kula beberaken sakmenika, Kula ajrih menawi malah dados ruwet perkawisipun. Kaliyan malih kula taksih pados bukti ingkang akurat .

Awit menika ngembet tiyang katah...

21.PATIHMEGA MENDHUNG

(Nyembah ) Menawi wonten kepareng Dalem.. Enggal kemawon Nandalem utusan nayaka pados sisik melik perkawis ingkang dipununjukaken Penewu Sengkuni menika Kanjeng. Jalaran perkawis menika menyangkut kawibawan Ndalem mandhaping Nayaka Praja Mendhang Miring.

(Penewu Sengkuni Kemaki njupuk buah nanging dipun samplak tanganipun kaliyan Bupati Kandha Maruta) Panewu Sengkuni cengingas-cengingis..

22.BUPATI KANDHA MARUTA

Heh.... ! Sapa sing dhawuh ?!

23.PENEWU SENGKUNI

(Cengingas-cengingis kewirangan ) He...he....Kepingin.......

24.PATIH MEGA MENDHUNG

(Sajak ngece ) Syukurrr ! wong kok lancang.....ora didhawuh kok trunyukan...

25. PENEWU SENGKUNI

( Nyembah ) Nyuwun pangapunten Kangjeng....

Menawi saking wawasan kula perkawis menika kedah ngatos-atos anggenipun ngrampungi. Menawi mboten kawula Medhang Miring saget bergejolak. Kepercayaan kawula tumrap kawibawan dalem saget pudar.

26. BUPATI KANDHA MARUTA

Seka kuwi aku arep membentuk Tim kanggo nylidhiki perkawis Markus bulu bekti iki. Mula perkara iki kudu enggal bisa terungkap. Sapa saktemene sing bermain lan terlibat ana ing perkara iki. Saiki timbalana Indrayana supaya ngadhep aku.

27.PATIH MEGA MENDHUNG

(Nyembah- - Mantep ) sendhika !

( Kaliyan Penewu Sengkuni ) Aku apa kowe sing nimbali Indrayana...?

28. PENEWU SENGKUNI

Patihe niku kula napa sampeyan...?

29. PATIH MEGA MENDHUNG

( Radi sengol ) Ha hiya aku ?!

30. PENEWU SENGKUNI

Lajeng ingkang dipun utus menika sinten.....?

31. PATIH MEGA MENDHUNG

Ha hiya aku.......

32. PENEWU SENGKUNI

Ha injih mangga....(Grenengan ) Nek gaweyan kok ditawak-tawake.

Ning nek nampa kekucuhan ngglenggem meneng wae.....

33.PATIH MEGA MENDHUNG

Sapa kuwi...... ?   Grenengan...... Adate kuwi sokcemongol-congol.... ben kethok.

34.PENEWU SENGKUNI

(Sengol ) Kula..kula !  Lereke mung arep ngenani aku ta ?..ndhadak mubeng menger.

(PatihMega Mendhung lajeng nimbali Indrayana . OUT.

IN malih sampun kaliyan Indrayana)

35.PATIH MEGA MENDHUNG

(Nyembah ) Menika Indrayana Kanjeng...Sumangga anggen nandalem paring dhawuh.

36.BUPATI KANDHA MARUTA

Mesthine sliramu kaget ndhak timbali.....

37. INDRAYANA

( Nyembah – Alus ) Nun injih Kanjeng.... Sabda dhawuh dalem.

38. BUPATI KANDHA MARUTA

(Sareh – Wibawa ) Rebut cukup wae Indrayana. Sliramu dak timbali iki bakal tak dhawuhi membentuk Tim peneliti ngenani para sudagar keng padha ngemplang anggone asok Bulu Bekti ana ing kabupaten Mendhang Miring.

Apa bener angone padha ngemplang mau merga ana konspirasi karo Nayaka Praja Medhang Miring. Yen pancen ana enggal unjuk aturna aku.

39. INDRAYANA

( Nyembah – Alus ) Nun injih sendhika ngestokaken dhawuh Kanjeng.

CUT TO :

ADEGAN            : KA III. DALEM KAPANEWON

SWASANA         : GEMBIRA

IRINGAN            : NGUNDHAMANA

PARAGA            : 1. EMBAN

                               2. JURUTAMAN

                               3. NYI PENEWU

                               4. INDRAYANA

                               5. PANEWU SENGKUNI

                               6. BEBAU SANDI

                 

KATRANGAN   :a. Emban kaliyan Jurutaman Nembang Ngundhamana.

01.JURUTAMAN

(Merayu ) Oh,.... ? Dhiajeng Mbiting....I love youfull.....

02.EMBAN

(Kemayu – Manja ) Wegah aku,.... ndhak kaya mbah Surip......Kula sampun mbiting ta kramas... i’hik....i’hik.....

03.JURUTAMAN

Mbiting kuwi mbabi glinting.........

( Sengol ) Huuu,.... Kemayu ! Rumangsamu dadi apa ta kowe ?!

04. EMBAN

( Clingusan ) Lo... ya aja kaya ngono Kang...... Ya sekali-sekali ta, ngrasake dadi wongmukti.... Apa mung wong sing kesinungan bandhaSing oleh seneng. Lan Bahagia..... ? Aku kuwi ya dhuwe hak seneng.......

Enyel-enyelangojeg sak-cukupe... Improvisasi. Ning kudu lucu....

Dhatengipun : Nyi Penewu.

05. NYI PENEWU

( Alus – Wibawa ) E..e..e...dha ngapa ta ya ? Tak mirengke seka patunggon kok kaya le gayeng banget.

Emban kaliyan Jurutaman ketingal ajrih. Clingusan saling menuding.

06. NYI PENEWU

( Alus – Cetha ) Ya kaya ngene iki lo, sing marahi nambahi ruweting praja.

Kowe kuwi abdi kapanewon. Abdine Ndara penewu Sengkuni wae padha saling curiga... Padha ora gelem ngakoni kesalahane malah padha nyalahke cokot –cokot dadeke kawula banjur tipis kepercayaning marang nayaka praja.

07. JURUTAMAN

( Nyembah ) Injih nyuwun pangapunten Ndara. Kula kok ingkeng lepat...

08.NYI PENEWU

La ngono kuwi nek malah apik ta ? ngakoni keluputane. Banjur njaluk pangapura..

nek malah ora udrek-udrekan ta ? Rampung.

09. JURUTAMAN

Injih Ndara.......

10.NYI PENEWU

Wis,..sak-iki neng ngendi momonganmu.. Rayung Wulan...?

11.EMBAN

La,... menika wonten kolam taman ngajeng.... Nembe miru sinjang.

Ngendhikanipun kaliyan nengga janakanipun...injih Nakmas Indrayana...

12. NYI PENEWU

Em,.... ,bok coba aturana supaya mrene...

13. EMBAN

Injih sendika Ndara Newu...

Emban lajeng ngaturi Rayung Wulan...

KATRANGAN   : Dewi Rayung Wulan ngadhep Nyi Panewu

01.NYI PENEWU

( Grapyak ) Kene,...kene,... cah ayu Dewi Rayung wulan....

 (Dhateng emban) Kana dirampungsi sik gaweane sing neng mburi..

02.DEWIRAYUNG WULAN

Injih Ibu,... Wonten wigati menapa ibu nimbali kula ?

03.NYI PENEWU

Ya mung kepingin wawan rembug marang sliramu kok Cah ayu.

Lagi ngapa iki mau, heh ?

04.DEWIRAYUNG WULAN

Nembe.........

05.NYIPENEWU

(Cepet nyahut ) Lagi ngenteni Indrayana ? Hiya apa ?

06.DEWIRAYUNG WULAN

(Radi lingsem ) Injih Ibu,...

07.NYIPENEWU

( Alus – Cetha ) Ngono ya ngono ning mbok ya aja ngono,? Krasa lo? Calon garwamu nek tansah tok antu-antu kaya ngono kuwi ? Merga tresnane marang sliramu bisa tumus ing ati. Marahi kemrungsung yen arep tumindak apa wae.

08.DEWI RAYUNG WULAN

( Nyembah – Alus ) Nyuwun pangapunten Ibu. Menapa injih klentu menawi kula menika ngajeng-ajeng kangmas Indrayana. Jer kangmas Indrayana menika calon garwa kula. Rak Injih sampun sak-limrahipun ta Ibu.

09.NYI PENEWU

Ya pancen orak leru. Ning yen kaya ngono polahmu kuwi jenenge sliramu ora menehi kebebasan marang Indrayana. Karo meneh sliramu ya kudu ngerti. Menawa Indrayana kae senajan ora nduwe kedudukan ana ing kapanewon munggahing kadipaten Medhang Miring nanging calon garwamu kuwi piyayi sing disuyuti dening kaum muda lan disungkani marang kabeh nayakapraja medhang Miring dadi panutan lan wis dianggep tokoh masyarakat.

10.DEWI RAYUNG WULAN

Injih, kula ngertos Ibu. Nanging ati wanita menika mboten saget pun pungkiri menawi tansah sumelang lan kuwatos menawi calon garwanipun ndangu mboten wonten kabaripun.

11. NYI PENEWU

( Cepet nyahut ) Ya ati kaya ngono kuwi sing kudu tok peper. Sapa ngerti yen calon garwamu kuwi lagi ana perkara sing kudu dirampungke.

(Dhatengipun Indrayana.)

12.INDRAYANA

Kula nuwun Ibu......

13,NYIPENEWU

(Grapyak ) Weh,... mangga...mangga... Nakmas...

14.INDRAYANA

( Alus ) Injih Ibu....

15.NYI PENEWU

Ki lho,... sing kok arep-arep wis teka..

16. DEWI RAYUNG WULAN

( Radi lingsem ) Ibu menika mesti ngaten lo ?

17. NYI PENEWU

Lo,... wong nyatane rak ya ngono ta ? Kaya Ibu kuwi ora nate dadi cah enom.

Ibu kuwi wis nate kaya sliramu,... ning sliramu rak durung nate kaya Ibu ta ?

Ngono wae ndadak......

18. DEWI RAYUNG WULAN

( Cepet nyahut - Radi lingsem - Alus ) Ibu menika lo,....

19. NYI PENEWU

Iki mau sliramu rak tansah ditunggu-tunggu lo Nakmas Indrayana...

20. DEWI RAYUNG WULAN

Mboten kangmas. Ibu menika remenipun ngaten menika..

21. NYI PENEWU

Ha, yah,..tenane,... ? Ngono wae kok isin lo...? wong nyatane mau le ngarep-arep ya nganti mata walangen kok. Bareng sak-iki wis teka ngganggo isin barang,... Hiya ora ?

(Dhatengipun Penewu Sengkuni nyawang Indrayana sajakkirang remen.

Lajengmlebet pepungkuran)

22.DEWI RAYUNG WULAN

( Ngungun ) Ibu,... Rama Penewu menika........

23.NYI PENEWU

(Cepet nyahut ) Wis dikepenake dhisik .... Mangga lo Nakmas Indrayana dipun sekecakaken..Ibu tak nyuwun pirsa Ramamu....

(Nyi Penewu lajeng mlebet nututi Penenwu sengkuni.

Bebau Sandi ingkang ndherekaken Penewu sengkuni nyawang Indrayana ugi lajeng mlebet)

24. INDRAYANA

( Nyawang – unjal napas ) Ndara Penewu kae sajake lagi ana bab sing dipenggalih..Mula ayo awake dhewe sumingkir wae dhisik.

25. DEWI RAYUNG WULAN

Injih mangga kangmas.

(Indrayana kaliyan Dewi Rayung Wulan lajeng samisumingkir.

IN : Penewu Sengkuni sinambi ngunjuk ketingal mangkel manahipun.

Nyi Penewu nututi wonten wingkingipun kaliyan bektabuah-buahan.)

26. NYI PENEWU

( Alus ) Wonten menapa ta kangmas Penewu ? Kok mboten kados adat saben ?

Wong ana nakmas Indrayana calon mantune barang kok ya.... ?

27. PENEWU SENGKUNI

( Cepet nyahut - Sengol ) Nek ana Indrayana terus ngapa ?!

Kon nggendhong ngono apa ?!

28. NYI PENEWU

Njih mboten ngaten menika.. Rak ya saru ta ? menawi dipun sawang calon mantu...

29. PENEWU SENGKUNI

( Sengol – Sinis ) Sing kandha sapa ?! Mulane nek ora ngerti kuwi meneng wae!

Ora ndemimil nithil terus !

30. NYI PENEWU

( Radi jengkel ) Ha injih mboten saget. Nek kon meneng wae.

Wong nyawang garwane salin serengat kok kon meneng wae ! Mulane kula kudu ngerti tenane niku onten napa  ? Teka-teka kok njur mbesengut. Pasuryane nglumpuk.

31.PENEWU SENGKUNI

(Grenengan – Jengkel ) Cah kuwi lak ora dhuwe aturan ! Tlunyak-tlunyuk !

32.NYI PENEWU

Mangke rumiyin ta ? Ingkang mboten gadhah aturan niku sinten ?

Trus sing tlunyak-tlunyuk niku sinten ?

33. PENEWU SENGKUNI

( Sengol ) Ha hiya Calon mantumu kae !

34. NYI PENEWU

( Ngungun ) Mangke rumiyin ta ? Calon mantuku,..? Indrayana menapa ? Penjenengan menika dos pundhi ta ? Nakmas Indrayana menika rak ya asring tindak kapanewon ta ? kesupen menapa dos pundhi ? Wong malah penjenengan njih sampun paring lilah, malah ugi sampun mangestoni sambung tresnanipun ingkeng putra kaliyan Nakmas Indrayana. Injih mboten ?

35. PENEWU SENGKUNI

( Sengol ) Kuwi nek mbiyen !

36. NYI PENEWU

( Saya bingung ) Kula kok malah sansaya ora mudheng kaliyan pangandika penjenengan ta ? Tenane niku onten napa ta ?

37. PENEWU SENGKUNI

( Cetha – Sengol ) Sengara mudheng. Ngertimu kuwi apa ?

Biyen aku pancen nggadhang Indrayana kuwi dadi mantuku. Merga harapanku bisa ngewangi aku nutup perkara sing lagi dadi kembang lambe. Ning Indrayana malah saguh membentuk tim kanggo bongkar skandal Medhang Miring.

Kamangka yen nganti kebongkar tenan, perkara iki akeh sing terlibat. Klebu......

CUTTO : PARAREL

PANGGUNG SEBELAH

ADEGAN                  : KA IV. TAMAN KAPANEWON

SWASANA                : KENCENG

IRINGAN                  : ILUSTRASI PERKUSI

PARAGA                  : 1. INDRAYANA

                                      2. DEWI RAYUNG WULAN

                                      3. BEBAU SANDI

KATRANGAN   : a. Pararel adegan KA.V. Dialog Penewu sengkuni.

01.INDRAYANA

( Pararel dialog Penewu Sengkuni – Cetha ) Rama Penewu Sengkuni.

Lan akeh Nayaka praja sing uga terlibat ngenani skandal iki.

Malah indikasine Kanjeng Adipati bisa uga terlibat. Kuwi sing njalari Rama sengkuni beda tumanggape marang aku. Jalaran aku nyaguhi mbentuk tim bongkar skandal iki.

 02. DEWI RAYUNGWULAN

O,... Menika ta perkaranipun. Ha mbok njih sampun penjenengan ora usah melu-melu perkara menika. Menawi tundhonipun saget ngancam kasugengan penjenengan.

03. INDRAYANA

( Matep ) Akuora isa lepas tangan nganani skandal iki, Rayung Wulan. Merga yen aku ora wani bongkar mengkono dadi ora karu-karuan kahanan Medhang Miring. Jalaran skandaliki wis ora isa ditolerensi meneh. Merga ora mung ngrugeke Kadipaten Medhang Miring. Nanging kawula sing kena imbase. Sing kudune wulu wektu mau kena kanggo mensejahterakan kawula nanging padha di rayah dening Nayakapraja. Klebu,...

04. DEWI RAYUNGWULAN

( Radi mangkel – Manja ) Rama sengkuni,..?! Injih ta ?!  ( Mlengos nebih )

05. INDRAYANA

( Alus ) Lo,...lo,...lo,...Ya aja njur kaya ngono kuwi ta Rayung Wulan....

Iki tanggung jawab moral kanggo njejekake pranatan keng bersih dan berwibawa.

06.DEWI RAYUNG WULAN

( Taksih radi mangkel ) Kula ngertos kangmas. Nanging kula menika namung ngeman penjenengan. Menawi ngantos terlibat perkawis skandal menika.

Paribasan geni menika sampun ageng. Menawi penjenengan mbudidaya bade nyirep geni ingkeng sampun ageng mremen wonten pundi-pundi tundhone malah penjenengan piyambak ingkeng bade cilaka. Menapa malih kula yakin. Penjenengan temtu bade fokus perkawis skandal menika. Trus lali kaliyan kula Kirang perhatianipun tumrap kula. Injih Ta ? Sami kemawon tipis katresnan penjenengan tuprap kula.

 07. INDRAYANA

Kosik ta ? Sliramu aja trus dhuwe panyakrabawa kaya ngono kuwi Cah Ayu.

Karo meneh sliramu kudu bisa milah-milahake Katresnan lan Kuwajiban. 

Ngenani kuwajiban iki pancen kudu takrampungake. Yen ngenani katresnan sliramu tak kira wis bisa mbuktekake. Menawa ora ana wanita keng ngratoni atiku kejaba sliramu. Apa perlu aku mbukteke meneh Cah Ayu........

(Nembang romantis.

Dhatengipun Emban.)

 08. EMBAN

Nyuwun pangapunten. Ngganggu Ndara. Penejenengan dipun timbali ingkeng Rama.

 09.DEWI RAYUNG WULAN

 Kangmas,...? mangga sesarengan sowan Rama..

 10.INDRAYANA

Ora Rayung Wulan. Aku malah arep nyuwun pamit. Aturna Rama lan Ibu.

Menawa aku pamit. Sungkemku wae katur ya.

(Rayung Wulan lajeng kesah. Indrayana nyawang kesahipun Rayung Wulan.

IN: Bebau Sandi mlampah mboten nggatosaken Indrayana.)

 CUT TO :

ADEGAN                  : KA V. OMAH SUGIH

SWASANA                : GUMYAK

IRINGAN                  : GECUL

PROPERTI               : TENGGOK – JANGANAN – PADI – PIKULAN –BUKU

PARAGA                  : 1. GONYAK

                                      2. GANYUK

                                      3. JURAGAN BRONO LUWIH

                                      4. PANEWU SENGKUNI

                                      5. TIYANG DHUSUN

KATRANGAN   : a. Gonyak-Ganyuk sami gegojegan sak-cukupe. Improf.

 01.GONYAK

( Saksampunipun gojek )Nyuk. Iki piye kok ora cocok karo cathetane.

 02. GANYUK

Wegah nek le nggundhang mung Nyuk. Mengko dikira munyuk.

 03.GONYAK

Lakon nggundang sapa wong jenenge Ganyuk. Penake kuwi rak ya disingkat ta. Nyuk. Apa kon nggundang Gan.... Ko malah dikira juragan.

 04. GANYUK

Ha ya dikompliti. Ganyuk. Senenge kok korupsi. Mung jeneng wae kok dikorupsi.

 05. GONYAK

Ya wis....Iki piye selip lo. Karo catetane iki. Karo meneh iki piye ta leh mu nyathet ?

Kok malah tok gambar. ?

 06.GANYUK

Wah,..kowe kuwi kuper tenan kok. Iki laporan tentang dagangan bolah.

Bolah kae gambare rak ya ruwet ta. Ha iki gambar bolah.

 06. GONYAK

O,.. dadi nek laporan dagangan kuwi miturut dagangane ta? Nek dangane Bolah laporane gambar ruwet ngene iki. Ha nek dagangane uyah ya terus tok gambari laut...

 07. GANYUK

Ha hiya. Laut kuwi rak asin. Sama dengan uyah. Nek gula ya gambar semut. Ada gula pasti ada semut. Ya ora ? Wong kuwi kudu kreatif...

(Dhatengipun juragan Brono Luwih)

                                               

 08. JURAGAN BRONO LUWIH

Heh ! Kowe kuwi malah dha ngapa ta ? Takrungoke seka njero kok udrek – udrekan.

 09.GONYAK

Mangga Juragan. Menika nembe nyatheti dagangan ingkeng medal....

 10.JURAGAN BRONO LUWIH

Piyewis tokcedhaki wong-wong sing dha asok bulu bekti ? Iki bisnis lo ?

 11.GONYAK

( Mantep ) Sampun Juragan. Menika mangke bade sowan mriki....

 12. GANYUK

( Mantep ) Mboten namung tiyang ingkang badhe asok bulu bekti. Nanging tiyang ingkang sami ngemplang Wulu Wektu mboten asok glondhong pengarem-arem ugi kula cedhaki. Kula sarankan sowan penjenengan.

 13. JURAGAN BRONO LUWIH

Bagus nek ngono. Merga aku wis kerja sama karo ndara Penewu Sengkuni. Ning iki aja nganti bocor lo ya ? Merga yen nganti bocor kowe uga bakal melu cilaka.

(Dhatengipuntiyang-tiyang dusun ingkeng bade asok bulu bekti.)

14. JURAGAN BRONO LUWIH

Kene..kene.. mlebua. selehke kene!!

Gonyak-Ganyuk nyateti tiyang-tiyang dhusun ingkeng bade pasok bulu bekti.

Dhatengipun Penewu Sengkuni kaliyan Bebau Sandi . Lajeng pun jak mlebet kaliyan Juragan Brono Luwih.

15. PANEWU SENGKUNI

(Menggos-menggos rada panik) Kula Nuwun..

16. JURAGAN BRONO LUWIH

We...mangga-mangga.. pinarak lenggah ngriki wak. Wonten napa kok sajake krenggosan ngaten niku?

17. PANEWU SENGKUNI

Gawat!! Gawat iki Gan!!

18. JURAGAN BRONO LUWIH

Napane sing gawat? Alon-alon ta, ingkang sareh.

19. PANEWU SENGKUNI

Dangu-dangu perkawis menika saget terungkap. Sabab....

20. JURAGAN BRONO LUWIH

(Nyaut) Sebabipun menapa wak?

21. PANEWU SENGKUNI

Bupati Kandha Maruta menika membentuk tim investigasi ngenani perkawis menika. Awit kula damel ontran-ontran bilih sudanipun asok wulu wetu menika amargi wonten salah satunggaling Kapanewon ingkang mboten purun asok. Kula dhawahaken dakwa kula marang Kapanewon Margamulya.

Lha cilakanipun ingkang dados ketua badan investigasi menika Indrayana, calon mantu kula. Ora wurung perkawis menika rak bakal terbongkar. Napa malih lagakipun Indrayana ingkang ndrawasi. Kaya-kaya sampun curiga marang tumindakipun kula.

22. JURAGAN BRONO LUWIH

Wadhuh...!! Bahaya iki. Njur piye iki wak.

23. PANEWU SENGKUNI

Awake dhewe kudu nganggo siasat, nganggo strategi.

24. JURAGAN BRONO LUWIH

Lajeng kersanipun jenengan dos pundi?

25. PANEWU SENGKUNI

Mekaten Gan. Kedah wonten politik pencitraan.

26. JURAGAN BRONO LUWIH

Walah, jenengan niku lho..kados DPR badhe nyalon mawon..  

27. PANEWU SENGKUNI

Lho...niki kangge mengalihkan perhatian. Sedaya tiyang dhusun dipunkempalaken wonten ngriki. Punajak seneng-seneng, tanggapke penari. Supaya warga mboten curiga. Mesthinipun para warga mangke remen kalih awake dhewe.

28. JURAGAN BRONO LUWIH

Wah ya, heke. Gathuk kuwi. Nek umat kowe kok cerdas wak? He he he

29. PANEWU SENGKUNI

Ngono kuwi ya ngenyek.....Wis ayo ndang disiapke.

KOLABORASI TARI

Tiyang dhusun kempal wonten ing griyanipun Juragan Brono Luwih, sami mirsani beksan lan dherek seneng-seneng

CUT TO :

ADEGAN                  : KA VI. PASAR

SWASANA                : RAME

IRINGAN                  : ..................

PROPERTI               : LAPAK DODOLAN

PARAGA                  : 1. BAKUL-BAKUL PASAR

                                      2. INDRAYANA (NYAMAR)

                                      3. TELIK SANDI KAPANEWON MARGAMULYA

                                      4. GONYAK

                                      5. GANYUK

KETERANGAN : Wong pasar padha ribut ngrebug reregan kang saya mundhak. Ketekan Indrayana kang nyamar dadi wong dhusun, ethok-ethok tuku janganan.

BAKUL-BAKUL
(improv. Ngomongke kahanan reregan lan pajeg negara)   

Ketekan Indrayana kang lagi nyamar

01.BAKUL
Mangga lho kang, jangane niki.. teronge, timune, kacang-kacange.. Ning nggih panci awis reginipun.

02.INDRAYANA
Lha kok saget larang Yu? mboten kados biasane.

03.BAKUL
Lha mendhete mawon larang kok Kang. Anggone nyade nggih larang, nek murah nggih rugi kula mangke..

04.INDRAYANA
Mendhetipun saking pundi Yu?

05.BAKUL
Jenengan niku lho, kok kaya ethok-ethok mboten pirsa ah. Lha pundi malih nek mboten mendhet saking Juragan Brono Luwih.

Tekane kacung-kacung Juraga Brobo Luwih

06. GONYAK
Heh...Nyuk...

07. GANYUK
Piya Nyak?

08.GONYAK
Uasem tenan! Banyak apa piye??

09.GANYUK
Lha kowe ngundang ya Nyuk e. Ganti tak wales a cah..

10. GONYAK
Awake dhewe ki beja ya?

11. GANYUK
Bejane???

12. GONYAK
Lha kok ora ki piye.. Wong awake dhewe ki melu karo Juragan Brono Luwih. Nadyan kadhang kala disentak-sentak, ning rak sembarang dicukupi. Kopi, udut, mangane sega, lawuh daging terus..

13. GANYUK
Heke ya Nyak.. Gawene mung nyatheti wulu wetu saka wong dhusun sing gampang diapusi kae. Sembarang keturutan, paribasan weteng ora tau ngelih. Ha ha ha..

14. GONYAK
Heh!! Aja seru-seru ngomonge, krungu wong mengko.

15. GANYUK
Ning nyatane rak ngono ta Nyak. Jan-jane wong-wong kae rak mung diakali thok. Asil bumi kae dituku Juragan kanthi rega murah, banjur didol karo bakul-bakul pasar nganggo rega larang. Banjur reregan dadi mundhak kabeh. Dadi, gelem ora gelem, wong dhusun kae ya kudu ngedol asil bumi sakakeh-akehe. Supaya isa entuk dhuwit akeh..lan isa asok pajeg terus.

16. GONYAK
(cepet-nyaut) Kowe ki piye ta Nyuk? Malah saya tlunyar-tunylur anggonmu muni.. Kok nganti krungu wong kae, perkara iki isa kebongkar. Juragan Brono Luwih karo Panewu Sengkuni kae isa dikunjara, ora wurung ya awake dhewe melu kena ukuman!! Wis..wis.. ayo nutukke laku...

Gonyak-ganyuk neruske lakune. Omongane kaprungu Indrayana lan Telik Sandi Kapanewon Margamulya 

CUT TO.....

ADEGAN                  : KA VII. KAPANEWON MARGAMULYA

SWASANA                :

IRINGAN                  : ..................

PROPERTI               :

PARAGA                  :  1. PANEWU MARGAMULYA

                                       2. TELIK SANDI

                                       3. TIYANG DHUSUN

KETERANGAN :

01.NYI PANEWU MARGAMULYA

Ingkang sabar Pakne.. mbok menawi tahun menika panci pacoban tumrap Kapanewon menika.

02. PANEWU MARGAMULYA

Ora Bune. Panewu Sengkuni wis kurang ajar. Bisa-bisane nggawe ontran-ontran yen sabab sudane asok wulu wetu ing Kabupaten Medhang Miring marga Kapanewon Margamulya ora gelem setor pajeg.

03. NYI PANEWU MARGAMULYA

Inggih.. Nanging kula aturi sabar sawetawis, dipunpenggalih rumiyin. Penjenengan menika panutan wonten ing Kapanewon Margamulya menika. Sampun ngantos pangandikan ingkang medal saking lesan penjenengan malah sansaya ndadosaken muntaping swasana.

04. PANEWU MARGAMULYA

Yen perkara iku, aku ki ya ngerti Bune. Nek perkara randate asok, kuwi pancen dak akoni. Jalaran asil bumi iki panene ora pati akeh, tur reregan ya mundhak kaya ngono. Nanging yen Kapanewon Margamulya didakwa mbalela ora gelem asok pajeg, pancen aku ora trima. Merga ora kabukti kaya apa sing didakwa.

05. NYI PANEWU MARGAMULYA

Inggih, Njur kersanipun penjenengan kados pundi?

06. PANEWU MARGAMULYA

(Bingung) Ya......ya....... piye ya Bune? Kuwi sing lagi tak angen-angen. Kepriye carane kanggo ngatasi perkara iki. Kamangka Njeng Bupati Kandha Maruta ora patia percaya karo pelaporanku, merga Kapanewon Margamulya kene kaetung sing kerep telat setor pajeg.

dhatengipun Telik Sandi Kapanewon Margamulya...

07. TELIK SANDI

Kula nuwun...

08. PANEWU MARGAMULYA

Mangga-mangga... mlebet ngriki.. sajake tekamu kok ngemenna, ana wigati apa?

09. TELIK SANDI

Nuwun sewu Panewu. Kepareng matur..

10. PANEWU MARGAMULYA

Hiya..hiya.. matura kang..

11. TELIK SANDI

Nyuwun duka menawi tumindak kula keladuk. Wiwit sewulan kepengker menika, mboten kautus, meneng-meneng kula dados telik sandi. Nlusap-nlusup ing Kapanewon sanes, saperlu pados informasi ngegingi sudanipun asok wulu wetu ing Kabupaten Medhang Miring menika Panewu.

12. PANEWU MARGAMULYA

Hiya.. ora apa-apa kang. Malah atiku bombong, krasa mongkok. Merga wargaku bisa nduwene pangrasa lan laku kang kaya mengkono. Banjur kepriye asile?

13. TELIK SANDI

Inggih Panewu.. Mekaten. Rikala kula nlusup awor tiyang dol-tinuku wonten ing peken. Kedadak wonten wiranem kalih ingkang mlampah liwat satengahing peken nyambi gojegan, crita anggenipun mocok ndherek Juragan Brono Luwih. Piyambakipun sakloron nyariosaken perkawis sudanipun pajeg. Ingkang sejatosipun hamung akal-akalanipun Panewu sengkuni ingkang skongkol kaliyan Juragan Brono Luwih. Kula kinten wiranem kalih wau keprucut anggenipun ngomong. Sabab sareng ngertos nek kula tingali, piyambakipun sakloron langsung cepet-cepet budhal.

13. PANEWU MARGAMULYA

Hemmm.. rak hiya ta Bu. Bener kaya apa sing penggalih piang-pirang dina iki. Sengkuni ki pancen wong culika!!!

14. NYI PANEWU MARGAMULYA

Nggih.. nadyanta kados mekaten, nanging Bapak sampun ngantos tumindak ingkang mboten-mboten rumiyin. Kedah dipunregbag rumiyin. Lapor kaliyan Njeng Bupati.

15. PANEWU MARGAMULYA

Ora bisa Bu. Iki kudu dirampungke sacepete!!! Mundhak kurang ajar. Sapenake dhewe nggawe pitnah, ndakwa marang Kapanewon Margamulya. Krasa kalorot kawibawanku!!!

(dhateng TELIK SANDI) Yen ngono kang, tulung siapke warga kakung sing keker-keker, sing rosa!! Sesok esok nglurug neng Kapanewon sisih. Ngrangket Panewu Sengkuni karo Juragan Brono Luwih banjur disowanke marang Njeng Bupati Medhang Miring.

16. TELIK SANDI

Inggih.. siap!!!

CUT TO........

ADEGAN                  : KA VIII. KAPANEWON SENGKUNI

SWASANA                :

IRINGAN                  : ..................

PROPERTI               :

PARAGA                  :  1. PANEWU SENGKUNI
                                       2. NYI PANEWU
                                       3. DEWI RAYUNG WULAN
                                       4. INDRAYANA
                                       5. JURAGAN BRONO LUWIH
                                       6. PANEWU MARGAMULYA
                                       7. TELIK SANDI PANEWU MARGAMULYA
                                       8. WARGA MARGAMULYA

KETERANGAN : Resepsi dhaupipun Dewi Rayung Wulan lan Indrayana. Ndadak Kapanewon Margamulya nggrudug Panewu Sengkuni lan Juragan Brono Luwih ana tengahing pahargyan.

KOLABORASI TARI 

Dhatengipun rombongan saking Kapanewon Margamulya

Whoi..!!!!whoi..!!!!!!.woi..!!!! (surak-surak gumuruh rombongan kapanewon Margamulya)

01.PANEWU SENGKUNI

Wehh..Mangga-mangga.. walah, mongkok ati kula. Jenengan rawuh kok rame-rame kaliyan warganipun. pinarak mlebet mriki. (dhateng Nyi Panewu, Juragan Brono lan kulawarga) Panewu Margamulya rawuh.... ndang dicaoske dhaharan lan unjukan..

02. PANEWU MARGAMULYA

(mantep) Ora perlu repot-repot... Tur tekaku ana kene ora merga nekani gawemu.

03. PANEWU SENGKUNI

Lho..lho..lho.. Wonten napa ta niki? Kok sajak rada seru pengendikanipun penjenengan niku lho.. alon-alon, dipunrembag kanthi.. wonten napa?

04. PANEWU MARGAMULYA

Wis!! Ora susah mbulet, ethok-ethok ora ngerti ngono kuwi. Saiki uga bakal tak dhudhah sandiwaramu, Sengkuni!! Uga kowe Brono Luwih!!!

05. JURAGAN BRONO LUWIH

(Rada gugup- keweden) Ma..ma..mangke rumiyin ta. Jan-jane niku wonten napa kok ndadak rame-rame ngaten niki.

06. PANEWU SENGKUNI

Sedulurku Panewu Margamulya.. dos pundi ta. Kula kok malah mboten ngertos kersanipun penjenngan. Sabar.. ngendikan alon-alon..

(nyambi ngrangkul pundhake P.Margamulya, nanging disemplag karo P.Margamulya)

07. PANEWU MARGAMULYA

Ora susah ndemek-ndemek pundhak!!! Becik kowe padha ngaku, sadurunge dikroyok wong semene akehe!!..

08. JURAGAN BRONO LUWIH

Kok malah ken ngaku niku dos pundi ta...?

09. PANEWU SENGKUNI

Jenengan niki lho, wayah rame-rame pahargyan anak kula kok malah ndamel sandiwara sing mboten-mboten. Kersane surprize ngaten nggih?? He he he...

10. PANEWU MARGAMULYA

Anggepmu aku iki guyon apa piye???!! Wis, ora susah kesuen!!
Aku wis ngerti kabeh. Sapa dhalange sing ndadekke swasana ora karu-karuan kaya ngene. Asil bumi dituku Juragan Brono Luwih kanthi rega murah banjur didol marang akul-bakul kanthi rega larang. Asok wulu wetu tiyang dhusun marang Negara disuda dening  Panewu Sengkuni. Saengga asok wulu wetu kang ana ing Kabupaten medhang Miring saya tahun saya mudhun. Banjur nggawe ontran-ontran yen sabab mudhune pajeg merga Kapanewon Margamulya sing ora gelem setor pajeg.

Ora ngira jebul Panewu Sengkuni kuwi Sindikat Mafia Pajeg ing Medhang Miring. Becik dak sowanake Njeng Bupati saiki uga..

(dhateng rombongan) Rangketen Panewu Sengkuni lan Juragan Brono Luwih!!!! Rangketen!!!

Panewu Sengkuni lan Juragan Brono Luwih dirangket, disowanake marang Bupati Kandha Maruta

CUT TO....

ADEGAN                  : KA IX. KADHIPATEN MEDHANG MIRING

SWASANA                :

IRINGAN                  : ..................

PROPERTI               :

PARAGA                  :  1. PANEWU SENGKUNI
                                       2. INDRAYANA
                                       3. JURAGAN BRONO LUWIH
                                       4. PANEWU MARGAMULYA
                                       5. TELIK SANDI PANEWU MARGAMULYA
                                       6. TIYANG DHUSUN MARGAMULYA LAN SENGKUNI

KETERANGAN : Bupati Kandha Maruta maringi pengadilan arupi ndhawahaken ukuman tumrap Panewu Sengkuni lan Juragan Brono Luwih.

01.PANEWU MARGAMULYA
Nuwun sewu Gusti. Kepareng kula matur minangka sulihipun para warga ing Medhang Miring. Bilih sampun kasil anggenipun miyak wewadi ing kabupaten Medhang Miring menika. Menika wau kula sakwadya para kawula ningkes sekongkolanipun Panewu Sengkuni dlasan Juragan Brono Luwih. Samangke, pradilan kula aturaken dhateng Njeng Bupati.

02.PATIH MEGA MENDHUNG
Sekedhap ta Panewu Margamulya. Dhodhok seleh perkarane kuwi kepriye? Sira kok bisa nibakake pandakwa marang panewu Sengkuni. Apa maneh sira kumawani menehi pradilan nglarak Panewu sengkuni dalasan Juragan Brono Luwih ing satengahing kutha. Yen ngono kena diarani, sira ndhisiki kersaning Njeng Bupati.

03.BUPATI KANDHA MARUTA
Pancen bener aturmu Patih Mega Mendhung. Mengko dhisik, sing sareh.. Aja kesusu ngluputake benering liyan, lan aja sumengka andhaku benering dhewe.

04.PANEWU SENGKUNI
Paduka leres Gusti. Menika namung akal-akalanipun Panewu Margamulya dalah sawadya balanipun, awit panjenenganipun iri, mboten saget asok wulu wetu langkung kathah tinimbang sengkuni. Estunipun nggih margamulya menika ingkang sampun tumindak culika ngeruk bandhaning negari. Mila mboten mokal lamun asiling wulu wetu tansah suda. Lha nggih pripun, wong pajege rakyat dipangan dhewe. Nggih ngaten niku.. cirinipun tiyang ingkang mblendhukaken wetengipun piyambak. Napa malih jenengan sampun dakwa ingkang mboten prayoga. Emut lho... fitnah itu lebih kejam dari pada pembunuhan..

05. PANEWU MARGAMULYA
cukup!! Cukup sengkuni!.. Yen ta ana menungsa kang tumindake kaya sato iku ora liya ya hamung awakmu. Ora mokal yen ta banjur oleh peparap “Sengkuni”.

06. BUPATI KANDHA MARUTA
Wis..wis... Kabeh aja padha rebut bebener. Panewu Margamulya, apa buktinira lamun dakwa Sengkuni lan Brono Luwih sing wus tumindak culika? Jejering Panewu sira kudune ngerti lamun matur ing sajroning pasewakan iku kepriye..

07. PANEWU MARGAMULYA
Lepat dalem sewu, nyuwun pangapunten Gusti.. Anggenipun kula sawadya kawula alit nibani pandakwan marang Sengkuni lan Brono Luwih iku ora liya awit asiling tim investigasi ingkang sampun sesingidan kangge madosi durjana ing Medhang Miring. Malah kaleresan ingkang mandhegani tim investigasi mboten sanes inggih nak Indrayana kang mboten sanes putra mantunipun panewu Sengkuni piyambak. Rak nggih ngaten ta nak mas Indrayana?

Kabeh padha meneng, pendhelengan ora ana sing padha ngaku..

08. BUPATI KANDHA MARUTA
Apa bener ature Panewu Margamulya? Mara sira age matura amrih enggal padhang dahuru ing Medhang Miring iki.

09. INDRAYANA
(BINGUNG..MENENG WAE)

10. PANEWU SENGKUNI
Lha..rak tenan ta ndara Gusti.. kabukten yen ta mboten saget nuduhaken buktinipun. Yen ngaten mangke kula saget mbalik nuntut dhateng KPK. lan mesthine aku njaluk reputasiku (nama baik) dibalekake meneh.  

11.BUPATI KANDHA MARUTA
Cukup sengkuni.. sira aja seneng gawe butheging banyu ing sajroning kolam. (mirsani warga) sepisan meneh takbaleni, sapa sing bisa menehi wangsulan, merga sira kabeh wus wani ngarak sawijining nayaka praja ing Kabupaten Medhang Miring.

12. DEWI RAYUNG WULAN
Nuwun sewu, kepareng matur Gusti..

13. BUPATI KANDHA MARUTA
Dewi Rayung Wulan, hiya matura ndhuk..

14. DEWI RAYUNG WULAN
Sarehne mboten wonten ingkang mangsuli. Kula ingkang badhe atur wangsulan.

15. BUPATI KANDHA MARUTA
Hiya ndhuk.. mara age wangsulana sing pratitis.

16. DEWI RAYUNG WULAN
Mundhut pangandikanipun tiyang sepuh, “becik ketitik ala ketara”. Mboten wurung perkawis menika bakal kadungkap. (meneng sedhela..)

17. BUPATI KANDHA MARUTA
Kepriye Rayung Wulan? Age bacutke..

18. DEWI RAYUNG WULAN
Kula asring ningali njeng rama rerasan kaliyan Juragan Brono Luwih. Pungkasan tigang dinten kapengker, rama Sengkuni kagungan karep tumindak culika. Menawi mboten pitados, para telik sandi menika seksinipun. Kekaronipun sami mrangguli rama dalasan juragan Brono ingkang nembe ndamel siasat.

19. PANEWU SENGKUNI
Rayung...!! Aja mbok terusake anggonmu banyolan ing pasewakan iki!

20. DEWI RAYUNG WULAN
Mboten rama, manika kedah dipun leresaken. Nadyan rama menika tiyang sepuh kula piyambak. Nanging lamun tumindak kang nora becik, menika kedah dipunlurusaken.

21. PANEWU SENGKUNI
Cukup Rayung!! Bapakmu tumindak kaya ngene iki ora liya hiya mung kanggo uripe mbokmu lan uripmu!!

22. BUPATI KANDHA MARUTA
Sengkuni!! Yen ngono pancen bener sira kang wus tumindak culika. Wongkang wus gawe ontran-ontran jebul sira dhewe kang dadi pelakune.

23. PANEWU SENGKUNI
Eh mboten leh Gusti.. menika wau rak pirembaganipun urusan kulawarga. Estu sanes kula ingkang sampun tumindak korupsi. Wong awak kula inggih tasih kados longlit ngaten kok, mboten lemu-lemu. Mangka jarene ketua KPK kae, pawongan kang wus tumindak korupsi iku biasane banjur lemu awake. Kaya ta Gayus, LHI lan liya-liyane.

24. BUPATI KANDHA MARUTA
Cukup sengkuni. Sira wis ora usah kakean muwus. Ing dina iki uga, sira bakal ingsun paringi ganjaran minangka gantine bandha negara kang wus kok slewengake!!! Kakabehing bandha donyaning Segkuni bakal ingsun mlaratake, kanthi cara dak lelang!! Kejaba kuwi, kalungguhane minagka Panewu uga dipocot. Sira uga nglakoni paukuman minangka tawanan negara. Lan ingsun bakal maringi ganjaran marang Indrayana, kandhi ngundhakaken pangkate satingkat.
Wus, ora usah nganggo suwe. Patih Mega Mendhung, enggal tibakna paukuman dhateng wong sakloron iki.

25. PATIH MEGA MENDHUNG
Sendhika Gusti...

Sengkuni lan Brono Luwih diarag menyang pakunjaran. Kluwargane padha nangis. Para warga padha sorak-sorak......