NASKAH KETHOPRAK "NGGAYUH PANGUWASA"_ASOSIASI ARTIS YOGYAKARTA

ADEGAN   : KA I. PLATARAN

SWASANA : GAYENG

IRINGAN   : DHINAMIS

WANCI       : ESOK

PROPERTI         : BENDERA OBAR-ABIR

PARAGA            : 1. PARA PAJINEMAN

                                      2. WONGSO DRIYO

                               3. RADEN AYU SATITI

                               4. PARAMPARA

KATRANGAN   : a. Wongso Driyo nglempakaken Para Pajineman lajeng pun arak nyambut   dhatengipun Raden Ayu Satiti.

                               b. Para Pajineman sami njejogetan.

01. WONGSO DRIYO

( Mantep ) Ca leren dhisik ! Iki Raden Ayu Satiti wis tedhak.

02. PAJINEMAN II.

( Mantep – Sero ) Satiti ?! 3X

03. PARA PAJINEMAN

( Mantep – Sero ) Mantep !  3X

04. RADEN AYU SATITI

( Sareh – Cetha ) Matur nuwun sanak kadhangku kabeh. Aku ora ngira menawa. Nganti kaya ngene anggonmu padha menehi pangormatan tumprap aku. Mula sak-iki aku malah butuh ngerti apa sing tok karepake tumprap aku. Dene sliramu kabeh padha njurung aku minangka dadi badan wakiling kawula Nogo Bondho.

05. PAJINEMAN I.

( Mantep ) Inijih Nyuwun pangapunten. Yek-tosipun kula sak-perangan taksih kepingin ngertos menapa Den Ayu Satiti. Sak-estu saget ngluwari kacingkranganing kawula Nogo Bondho sak-sampunipun lenggah dampar minangka dados wakiling para kawula ingkang sak-estu ngantos dumugi sak-menika taksih bingung. Bade menapa ?

06. WONGSO DRIYO

Heh ! Kowe durung percaya marang kawegigkane Den Ayu Satiti ta ?

07. RADEN AYU SATITI

( Sareh – Mantep ) Wis ben ora apa-apa paman Wongso Driyo. Aku ngerti kekuatiraning kawula. Jalaran pancen nganti sak-iki sak-perangan Parampara lan Nayaka durung ana keng dianggep makili suaraning kawula. Nanging ngganggep menapa isih mung nengenake butuhe dhewe.

08. PARA PAJINEMAN

( Saur manuk ) Leres !  Pancen niku kasunyatane !  Ora ana sing isa dipercaya !!!

09. RADEN AYU SATITI 

( Dhateng para kawula ) Sanak kadhangku kabeh. Ing ngarep aku wis nate ngendhika,

aku ora arep janji. Nanging menawa aku pancen tok sengkuyung minangka dadi pengayomaning kawula Nogo Bondho. Aku bakal mbudidaya ngluwari apa sing gawe bingunging kawula. Merga kanti cara apa wae durung bisa ngrampungke perkara.

10. PAJINEMAN III.

( Mantep ) Menapa Den Ayu sagah, sak-derengipun sak-estu dipun sengkuyung dening para kawula langkung rumiyin tumut tanggel jawab paring ngertos kados pundi caranipun kawula bade nyengkuyung salah satunggaling pengayoman. Ingkang ngantos wekdal sak-menika taksih katah kawula ingkang bingung.

11. RADEN AYU SATITI

Mesti wae saguh. Awit menawa kawula nganti bingung ora ngerti carane nyengkuyung, kuwi tegese aku durung bisa ngerti perkaraning kawula. Mula saka kuwi aku uga ngaturi Parampara supaya nylentrahake ngenani Pranata anyar Nogo Bondho.

( Dhateng Parampara ) Bapa. Sumangga penjenengan kula aturi paring ngertos ngengingi pranatan anyar Nogo Bondho ingkeng sampun dipun sarujuki dening para Parampara lan Nayaka Praja Nogo Bondho.

12. PARAMPARA

( Alus – Cetha ) Wonten ing serat Pranatan anyar ingkeng sampun dipun sarujuki sedaya Parampara saha Nayaka Praja Nogo Bondho, Wonten angger-angger ingkeng ungelipun.  “ Sok sapa-a ora mandhang Nayaka, Sentana lan kawula dhuwe wenang jumeneng minangka pangayomaning kawula. Lanang, wadhon ora kudu anak pembarep keng ateges anak nomer Siji, Loro,Telu, Waton disengkuyung dening kawula ya kuwi  ingkeng wenang minangka dadi wakiling kawula lenggah dampar Nogo Bondho. “

Menika babaraning Pranatan Anyar Nogo Bondho.

13. RADEN AYU SATITI

( Cepet nyahut  – Mantep ) Menawi ngaten kula ugi taksih wenang nglintir dampar

Nogo Bondha ?

14. PARAMPARA

( Alus – Cetha ) Sok-sintena. Menika ingkeng dipun sarujuki para Parampara tuwin

Nayaka Praja Nogo Bondho. Ingkang sampun kacakup wontening Pranatan anyar.

15. WONGSO DRIYO

( Mantep ) Piye ? Wis gamblang Ca ?! Menawa Den Ayu Satiti isih dhuwe wenang

makili sliramu kabeh. Yen pancen sliramu percaya lan nyengkuyung Den Ayu Satiti !

. 

CUT TO :

ADEGAN            : KA II. OMAH SUGIH

SWASANA                   : LUMRAH

IRINGAN            : ILUSTRASI PERKUSI

WANCI               : AWAN

PROPERTI         : TEH POCI – NYAMIKAN – TENGGOK – BLANJAN

KATRANGAN   : a. Pararel dialog Wongso Driyo.

01. MBOK SURO

( Pararel dialog Wongso Driyo – Cetha ) Sing ajeng percaya mawon sinten. !?

Wong nyatane pancen durung ana sing isa dipercaya. Napa malih sak-niki sing kepingin dha disengkuyung niku akeh. Dadi malah gawe bingunging kawula.

02. SURO

( Nyruput wedhang ) Lha hiya sing disengkuyung kuwi ya sing pancen dingerteni.

03. MBOK SURO

Le ajeng ngerti tenane mawon pripun ? Wong ngertine nggih mung saking gambar sing pating templek teng uwit lan prapatan nika. Ning dereng nate ta ? Tiyang sing kepengin disengkuyung niku nekani kawula.? Nepungke terus napa sing ajeng ditindhake.?

04. SURO

( Mantep ) Mulane kowe kudu manut aku nyengkuyung Den Mas Contreng.

Wis mesti ora bakal kleru.

05. MBOK SURO

Sampeyan niku kok seneng banget ta nek kandha kudu. Mbok ampun dikulinake tembung kudu. Kudu niku padha mawon meksa ta ?. Kamangka ati lan karep niku ora kena dikuduke je. Nek pancen piyayi niku isa dipercaya tenan kanti tindhak-tandhuk sing kena nggo patuladan. Ora dikuduke wae mesti disengkuyung kawula.

Ning nek mung dhuwe lara omong mawon sinten sing ajeng percaya.

06. SURO

La piye le arep ngrobah uripmu nek karo ati lan karepmu dhewe wae ora percaya.

07. MBOK SURO

Pancen angel je pakne. Nek ati niki wis kebacut ora percaya. Merga pun tumek diapusi.

08. SURO

( Ngundhang Sari ) Sari,... !

09. MBOK SURO

Sari teng pasar.

Dhatengipun Raden Mas Contreng.

10. RADEN MAS CONTRENG

( Alus ) Kula nuwun......

11. SURO

( Kaget gugub ) Weh,.. Mangga, mangga Den Mas.. Kok injih mboten utusan rumiyin menawi bade tindhak Rompog kula.

12. RADEN MAS CONTRENG

Pancen iki mau amung krenteking penggalihku kepingin aku nliti kawula Nogo Bondho Dadi saktenane ora ana wigati apa-apa kok.

13. SURO

Nanging kados pundi kemawon rak injih langkung prayogi utusan paring pirsa langkung rumiyin. Dados kula sak-gotrah saget caos pasunggatan ingkeng limrah.

( Dhateng Mbok Suro ) Mbokne ! Kowe kuwi kok malah mung dlongop wae ta ? Iki Raden Mas Contreng calon pengayomaning kawula Nogo Bondho (Dateng Contreng ) Nyuwun pangapunten Den Mas. Kula ngaturaken sembah bekti kunjuk.

14. RADEN MAS CONTRENG

Tak tampa bektimu.

15. MBOK SURO

Iki ta pakne Raden Mas Contreng. Kula ugi ngaturaken sembah Den Mas.

16. RADEN MAS CONTRENG

Yoh ndhak tampa. Iki sapa ta ?

17. SURO

Menika simah kula Den Mas. Nyuwun pangapunten dereng nate kula ajak sowan.

( Ngundhang Rimang ) Rimang,... !

18. RIMANG

( Mundhuk-mundhuk – Alus ) Dhawuh pak Suro...

19. SURO

( Radi alon ) Pak. Bapakmu apa ? Ndara. Awas angger muni pak meneh.

20. RIMANG

( Alus ) Injih ndara.

21. SURO

Unjukan kagem Raden Mas Contreng. ( Dhateng Den Mas ) Nyuwun pangapunten

Den Mas.Abdi enggal. Dados taksih kedah dipun ajari. Lan ugi dereng ngertos sinten ingkeng rawuh .

22. RADEN MAS CONTRENG

Ya ngenani kuwi lo ? Sing bakal tak pundhutake pirsa marang sliramu. Kenapa kawula durung ngerti marang aku. Jalaran tindhaku mrene mau kuwi uga ketemu pawongan ya sing durung ngerti marang aku.. Banjur wis tekan ngendi anggonmu menehi ngerti kawula ngenani aku bakal nggayuh dampar Nogo Bondho.

23. SURO

Menika namung dereng kemawon. Kula sampun ngrancang bade ngempalaken kawula wonten griya kula mriki. Mangke lajeng kula suwun penjenengan rawuh.

Paring pangandikan. Sampun kula pitados kawula bade mongkok manahipun.

24. RADEN MAS CONTRENG

Apa ora malah prayoga menawa ana ing Kasatriyan wae ?

25. SURO

( Mantep – Kemaki ) Wa,.. mboten ? Kawula malah ajrih bade dhateng ?

26. RADEN MAS CONTRENG

Yo wis yen ngono. Banjur wragate pira mengko sliramu matur wae. Ning nganu... aku arep mrene mau ketemu bocah keng ngaku jenenge,... Sari. Apa bener kuwi yogamu ?

27. SURO

( Mantep ) Injih Den Mas. Wonten menapa ta ?

28. RADEN MAS CONTRENG

( Radi gugup ) Ora kok. Ora apa-apa. Yen ngono aku pamit ya. Kapan wektune bakal ketemu kawula aku mung manut.  Mbok Suro. Sapa jenengmu ? Rimang ? Aku pamit.

Raden Mas Contreng bakal kundur nanging ora kanyana-nyana tekane Sari keng ya ora pati ngawaske keng pungkasane nabrak Den Mas Contreng. Tenggoke tiba ndilalah anggone bakal njupuk tenggok bareng Den Mas ya arep nulungi jupuk tenggok. Den Mas lan Sari tatapan. Sari dingkluk terus mlayu mlebu.

Rimang mung nyawang meneng wae. Nanging  atine duwe rasa sujono.

Raden Mas Contreng nyawang terus pamit. Suro nganggep Den Mas Contreng kepranan marang Sari. Suro banjur mbisiki mbok Suro.

29. SURO

Mbokne. Mrene tak kandhani.

30. MBOK SURO

( Dibisiki Suro – Sinis ) Huh,... ! 

Mbok Suro ngidid lunga. Suro nututi.

Rimang ngadheg nyawang ning ngemu rasa sujono marang Den Mas Contreng.

CUT TO :

ADEGAN            : KA III. KASATRIYAN

SWASANA                   : NGLANGGUT

IRINGAN            : ILUSTRASI PERKUSI

WANCI               : ESOK

PROPERTI         : LAYANG

PARAGA            : 1. RADEN MAS CONTRENG

                               2. SAPAR

                               3. WONGSO DRIYO

KATRANGAN   : a. Pararel Scene/Adegan Ka II.

                               b. CU : Raden Mas Contreng ngalamun nyawang tebih.

                              

01. SAPAR

( Alon – Nyembah  ) Kula ingkeng sowan Den Mas...

02. RADEN MAS CONTRENG

( Radi kaget ) Oh,.. Kene,kene Sapar sowanmu rada maju kene.

03. SAPAR

Injih sendhika Den Mas. ( Maju – Nyembah – Lungguh ) Sowan kula nglarapaken kakang Wongso Driyo ingkeng bade sowan nandalem Den Mas.

04. RADEN MAS CONTRENG

Hiya, hiya ndhak keparengake Sapar. Mangga Wa. Njanur gunung sowan kula bade wonten kawigaten menapa Wa ?

05. WONGSO DRIYO

( Nyembah – Alus ) Injih nyuwun pangapunten Den Mas. Sowan kula menika, kula dipun utus Den Ayu Satiti sakperlu maringaken nawala kunjuk penjenengandalem.

06. RADEN MAS CONTRENG

Kangmbok Satiti ? Kok kadingaren layang-layang barang. Injih kula tampi Wa.

07. WONGSO DRIYO

Lan kula supados nengga pangandika dalem ngengingi serat menika Den Mas.

Wongso driyo lajeng nyaosaken serat.

Sak-sampunipun serat pun waos dening Den Mas Contreng

08. RADEN MAS CONTRENG

( Mantep ) Wa Wongso Driyo. Kula sampun ngertos surasanipun serat menika. Pramila Wa Wongso Driyo kula aturi matur kangmbok Satiti. Bilih kula mboten saget nyengkuyung kangmbok Satiti nggayuh dampar Nogo Bondho. Jalaran kula ugi dipun sengkuyung para kawula Nogo Bondho supados lenggah dampar minangka badal wakilipun kawula Nogo Bondho. Malah menawi kersa kangmbok Satiti kemawon ingkeng nyawiji kaliyan kula. Nata kawula Nogo Bondho. CUT TO :

ADEGAN            : KA IV. PLATARAN

SWASANA                   : RAME

IRINGAN            : DHINAMIS

WANCI               : AWAN

PROPERTI         : GENDERA OBAR-ABIR

PARAGA            : 1. PARA PAJINEMAN

                               2. WONGSO DRIYO

                               3. SAPAR

                               4. PARAMPARA

KATRANGAN   : a. Para Pajineman sami nengga dhatengipun Wongso Driyo.

01. PARA PAJINEMAN

( Koor - Sero – Mantep ) Pokoke Satiti ! Pokoke Satiti ! Pokoke Satiti.

02. PAJINEMAN I.

( Mantep – Sero ) Satiti !

03. PARA PAJINEMAN

( Koor – Mantep ) Mantep !!!

Dhatengipun Sapar.

04. SAPAR

( Mangkel – Sero ) Heh ! Bubar ! Bubar !!! Hayo. Isa bubar ora. ?!

05. WONGSO DRIYO

( Rada sareh ) Dhek Sapar. Sampeyan ora isa mbubarke wong-wong iki. Jalaran iki tanda kastyaning kawula marang piyayi sing arep disengkuyung. Lan iki uga ora nyalahi Angge-engger kang kapacak ana ing Pranatan anyar Nogo Bondho.

06. SAPAR

Sing kandha nek niki mboten nerak angger-angger Pranatan anyar sinten ? Sampeyan niku mbok nyimak sing tenan. Sepisan tiyang-tiyang sampeyan niki dha ora duwe palilah saking Nayaka Praja ngenani le dha kumpul. Kaping pindho niki wewengkone sinten ? Niki wewengkone Den Mas Contreng. Nek ajeng loap-laop nggih teng wewengkon sampeyan dhewe mrika.

07. WONGSO DRIYO

Kula ngerti nek niki wewengkone Den Mas Contreng. Ning Sampeyan nggih nyimak. Nek sampeyan ora isa mbubarke wong-wong niki. Dede wewenang sampeyan nglarang tiyang sami kumpul lan ngumpul.

08. SAPAR

( Jengkel ) Pun kula ora butuh kekucah sampeyan. Sak-niki sampeyan saget mbubaraken tiyang-tiyang sampeyan mboten.?

09. WONGSO DRIYO

( Tegas ) Mboten ! Nek kula ora isa mbubarke terus ajeng napa ?

10. SAPAR

( Tegas ) Nek sampeyan ora isa kepeksa ajeng kula bubarke kanti peksa.!

Para Pajineman lajeng pating clebung. Swasan dados panas.

Dhatengipun Paramapara nyapih.

11. PARAMPARA

( Sero – Cetha – Wibawa ) Cukup ! Cukup ! Apa rumangsamu nek nganggo cara nggunake kekuatan kaya ngono kuwi banjur rampung apa ? Anane Pranatan anyar kuwi aja tok maknani kaya ngene iki. Pancen Pranatan anyar kuwi menehi kelonggaran marang kawula Nogo Bondho. Ning apa ya kudu kelonggaran kuwi banjur ora ana batese ? Aja kebablasen ta, anggone maknani kelonggaran. Kabeh pancen duwe wenang. Merga sakiki wewenang kuwi wis ana tanganing kawula. Ning nganggo tepa silara. Empan papan. Ngono ya ngono ning aja ngono. Wis ayo bubar kabeh.

Wongso Driyo. Sliramu kudu bisa ngendhake wong-wongmu. Merga sliramu sing dituake dening wong-wongmu. Lan kowe Sapar. Yen ana apa-apa kowe uga ora kena tumindhak dhewe. Nanging diaturake sing dhuwe wenang.

12. WONGSO DRIYO

Injih ngestokaken dhawuh.

13. SAPAR

Nggih sendika.

Para Pajineman lajeng sami kesah.

CUT TO :

ADEGAN            : KA V. OMAH SUGIH

SWASANA                   : ROMANTIS

IRINGAN            : ROMANTIS

WANCI               : BENGI

PARAGA            : 1. RIMANG

                               2. SARI

                               3. SURO

                               4. MBOK SURO

KATRANGAN   : a. Rimang ngalamun jengkel atine.

                               b.Sari dhateng. Rimang ngertos Sari dhateng lajeng bade kesah.

01. SARI

( Radi sero ) Kakang. Kakang Rimang. Arep menyang ngendi ?

02. RIMANG

( Ngampet mangkel ) Bade ngrampungaken pedamelan.

03. SARI

( Radi ngungun ) Lo, kakang ? Kok nganeh-anehi ta ? Ana apa ta kakang ?

04. RIMANG

( Ngampet mangkel ) Mboten wonten menapa-menapa kok. Sampun.

05. SARI

( Menggak ) Kosik ! Salahku apa kakang ? Kok kowe dadi beda anggoni nanggapi aku.

06. RIMANG

( Tatag ) Nyuwun pangapunten. Kula pancen mboten drajatipun caket penjenengan. Mas Roro langkung pas menawi caket Den Mas Contreng.

07. SARI

( Lega ) O,..kuwi ta perkarane. Kakang Rimang. Cethane kakang sujono marang aku ta.Merga aku ketemu Den Mas Contreng.

08. RIMANG

Aku ora sujono. Nanging aku ngrumaksani. Sarung Jagung. Bobotku apa kok aku wani nresnani kowe. Aku mung jejere batur, kamangka kowe putrane bendaraku.

09. SARI

Kakang. Tresna keng suci kuwi ora merga bondho lan donya. Nanging kasetyan lan kapercayan kuwi keng utama. Dadi aku nresnani kakang kuwi merga aku percaya menawa kakang kuwi setya. Lha kakng negesi tresna kuwi mung merga bondho lan donya ? Teges kakang durung ngerti tresna keng sejati. Kakang. Aku nate sumpah setya marang kakang. Jiwa ragaku tak pasrahke sak-wutuhe. Nanging menawa kurang percaya ya ora apa-apa. Pancen aku keng kurang pantes nresnani kakang. 

10. RIMANG

( Rumangsa salah ) Waduh. Nek ngono aku sing salah nangkep tresnamu Sari.

Aku luput.Aku durung bisa ngerti katresnan keng sejati. Aku njaluk pangapura Sari....

11. SARI

( Cepet nyahut ) Ning ngapa ? Isih durung percaya ta ?

12. RIMANG

Percaya, percaya. Sari. Kapan kabagyan iki isa dadi kasunyatan. Ora mung tansah sesideman. Yen ngrasake kaya ngene iki kaya-kaya selak kepingin dadi kasunyatan je.

Coba sawangen. Wulan purnama katone njurung marang katresnan iki.

Gandrung. Romantis. Rampung gandrung dhatengipun Suro. Ngertos Sari lan Rimang nembe andhon tresna Suro nesu.

13. SURO

( Tajem ) Sari...

14. SARI

( Kaget – Radi ajrih ) Pak,... ?

15. SURO

( Ngampet nesu ) Kaya ngono kuwi ta ?  Nek aku ora neng ngomah ?

16. RIMANG

( Alon – Tatag ) Nyuwun pangapunten ndara. Matur bares kemawon menawi sak-estu kula tresna dhateng Sari. Sari ugi tresna dhateng kula. Mila menawi wonten kepareng ipun kula nyuwun lilah lan pangestu.Sari bade kula ajak gesang bebrayan sesarengan.

17. SURO

( Ngampet nesu ) E,..m. Dadi kowe tresna marang Sari ? Sari uga tresna marang kowe Pancen wis lumrahe menawa wis padha tresnane kuwi Banjur mbangun bale omah. Nanging banjur arep tok pakani apa ? Apa kowe isa nuruti kesenengake Sari ?

Sari kuwi anak lo ? Anake wong sugih. Dadi aku wenang milih mantu.

18. RIMANG

Injih kados pundi kemawon kula bade mbudidaya amrih saget nyekapi kabetahan tiyang omah-omah. Ingkang baku kula tresna Sari ugi tresna.

19. SURO

Tak kandhani ya Rimang. Wong bebojoan kuwi ora mung cukup pawitan tresna ! Nanging bondho donya kuwi rangkeane. Rimang, Rimang. Bebet bobotmu wae apa kowe wani nyenengi anaku. Apa bandhamu kuwi wis kena nggo nambak kali. Apa ? Batur wae kemlinthi. Mbok ngrumangsani nek drajatmu kwui mung gedibal pitulikur.

Hayo minggat !  CUT TO :

ADEGAN            : KA VI. PLATARAN

SWASANA         : LUMRAH 

IRINGAN            : IKUSTRASI STRESSING

WANCI               : BENGI

PROPERTI         : KEPRUKAN

PARAGA            : 1. GLOWAH

                               2. GLOWEH

                               3. RIMANG

                               4. SAPAR

KATRANGAN   : a. Pararel dialog Suro

01. GLOWAH 

( Nyekeli sikili Gloweh ) Waduh. Nyuwun pangapunten Rama.

02. GLOWEH

( Kados Wrekudara ) Nek kowe ora gelem dhaup tak ajar ! Piye Tot gelem ora ?

03. GLOWAH

( Takon ) Kok Tot ? Jenengku sapa ta ?

04. GLOWEH

Kowe kuwi kocape dadi Gatotkaca. Aku Wrekudara. Wrekudara kuwi nek ngundhang Gatotkaca mung disingkat Tot. Wah jan bodo kok dipilihara.

( Wrekurada – Mantep ) Piye Tot kowe kudu manut aku. Dhaup karo putri pilahanku.

05. GLOWAH

( Kados Gatotkaca ) Nyuwun pangapunten Rama. Kula derek sagah ngladosi wanita. Kula taksih bade nerusaken kuliah.

07. GLOWEH

( Kados Wrekudara ) Sepisan menah. Gelam ora. Nek ora gelem tak ajar tenan lo,?

08. GLOWAH

( Kados Gatotkaca ) Kula dereng siap berumah tangga Rama.

09. GLOWEH

( Kados Wrekudara ) Gelem ora ? Tak ajar nek kowe ora gelem manut aku.

10. GLOWAH

( Kados Gatotkaca ) Mboten Rama.

11. GLOWEH

( Kados Wrekudara ) Gelem ra ?!

12. GLOWAH

( Kados Gatotkaca ) Mboten.

13. GLOWEH

( Kados Wrekudara – Mantep – Nggebuk ) Gelem ra ! Ayo kudu gelem !

14. GLOWAH

( Mangkel ) Bubar ! Bubar. Dadi Gatotkaca rong menit isa gagar otak aku. Bubar !

15. GLOWEH

Lo ? Jarene ngleluri kabudayan. Kok Mutungan ? Critane kuwi pancen ngono kuwi je.

16. GLOWAH

Ha teneh penak sing dadi Wrekudara. Aku Wrekudarane. Kowe Gatotkaca.

17. GLOWEH

Wis, ? Isa tenan dadi Wrekudara. Yo wis. Aku Gatotkacane. (Gatotkaca ) Kula Rama..

18. GLOWAH

( Kados Wrekudara – Mantep ) Kowe arep tak dhaupke Tot. Gelam ra.

19. GLOWEH

( Kados Gatotkaca ) Dhaup Rama. Kaliyan sinten Rama.

20. GLOWAH

( Kados Wrekudara – Mantep ) Karo Ellis. Ya karo Sembadra wah jan pekok. Lem ra

21. GLOWEH

( Kados Gatotkaca ) Injih sagah Rama. Sak-menika kemawon mangga enggal pun dhaupaken. Rama.

22. GLOWAH

( Kados Wrekudara – Mantep ) Kowe gelem tenan ? Gandheng Sembadra durung gelem kowe tak dhaupake marang putri liyane ya gelem ? Hayo gelem ora.

23. GLOWEH

( Kados Gatotkaca ) Waduh,... Sagah Rama.

24. GLOWAH

( Wrekudara – Mantep ) Gelem ?! Putrine dhuwe lara Mengi tur Aid. Piye ? Gelem ?

25. GLOWEH

( Kados Gatotkaca ) Mangke rumiyin Rama kula pikire. Injih sampun purun Rama.

Glowah mangkel merga ora isa mbales nggebuki Gloweh. Mutung.

26. GLOWAH

( Mangkel – Mutung ) Bubar ! Kapan lehku isa mbales nggebuki. Nek Gatotkacane cluthak. Waton putri gelem.

27. GLOWEH

Mulane dadi wong kuwi sing pinter. Ora mung pinter akal ning ya kudu pinter ngakali.

Kamangka sesuk kuwi Den Mas Contreng nak arep ngumpulke kawula. Menehi bantuan lan ngenalke menawa Den Mas Contreng kuwi ya maju, nyalon. Aku krungu kowe kang sing menehi ngerti piye cara milih nggo nyengkuyung Den Mas Contreng.

28. GLOWAH

( Kemaki ) Hu,... gampang nek mung kon nggenahke carane milih. Kecil Dim. Angger di coblos gambare Den Mas Contreng nak beres.

29. GLOWEH

Ngawur  ! Sak-iki wis ra model dicoblos. Ning di centhang.

Dhatengipun Rimang..

30. RIMANG

( Nubruk Glowah ) Pak,.. ! Patenana wae aku pak. Patenana aku !

31. GLOWAH

( Radi bingung ) Lo ? Kosik ta. Teka-teka kopk njuur kon mateni kuwi nalare piye. ?

32. RIMANG

Pokoke aku patenana pak.

33. GLOWAH

Aku kuwi dudu jagal. Kok kon mateni.Genahe kuwi je heh ?

34. RIMANG

Pokoke nek aku ora sida rabi. Aku trima mati pak.

35. GLOWEH

E,..gene mung njaluk rabi. Mbok ya dirabeke ta kang.

36. GLOWAH

Di rabeke ya dirabeke. Ning karo sapa. Wong Rimang durung tahu kandha aku je.

37. GLOWEH

Hiya le. Rabi kuwi rabi karo sapa ? Apa kowe wis dhuwe calon apa ? Terus sapa le.

40. RIMANG

Sari.

41. GLOWAH

( Kaget ) Heh ?! Mbok eling ta le, le.. Kowe kuwi anake sapa. Anak batur wae kok ya arep ngepek anake juragane. Cecak nguntal black. Sengara kelakone.

42. GLOWEH

Ya ora terus ngono kuwi kang. Jan ma tan kina ing ngina. Apa meneh jaman sak-iki. Waton bocahe wis padha geleme. Wong tuwa kuwi arep ngapa ta ?

43. GLOWAH

Aku ngerti. Weh. Bocah wis padha seneng. Ning sing angel kuwi rak malah wong tuwane. ? Hiya ora ?  Aku ora sanggup !

44. RIMANG

Ya wis pak.  Nek pancen bapak ora saguh. Wis dadis sumpahku. Aku luwung mati yen ora klakon urip bareng Sari. Aku pamit mati Pak !

Rimang bade nglalu dipun nggondheli Glowah -Gloweh. Sapar dhateng menggak.

45. SAPAR

Heh ! ? dingapa iki. ?!

46. GLOWAH

Anaku iki arep nglalu kang Sapar.

47. SAPAR

Lha kok arep nglalu kuwi genahe ngapa ?

48. GLOWAH

Njaluk rabi ning aku ora isa nuruti.

49. SAPAR

Gene mung njaluk rabi. Kok nganti direwangi nglalu. Dirabeke rak beres ta ?

50. GLOWAH

Beres. Nek sing arep dirabi kuwi anake wong lumrah. Ha Rimang kuwi kepingin rabi karo Sari anake kang Suro je. Apa ora malah kewirangan nek aku nglamarke. Wong watake kaya ngana kae. Lgi mendhem kuasa. Mendhem Bandha.

51. SAPAR

Anak polah bapa kepradah. Nek mung kuwi perkarane.Gampang.Sesuk kowe melu aku.

ADEGAN            : KA VII. KASATRIYAN

SWASANA                   : LUMRAH

IRINGAN            :

WANCI               : ESOK

PARAGA            : 1. RADEN MAS CONTRENG

                               2. SAPAR

                               3. GLOWAH - GLOWEH

                               5. RIMANG

                               6. SURO

                               7. SARI

KATRANGAN   : a. Den Mas Contreng ngalamun nyawang tebih..

01. SAPAR

( Alon – Alus ) Kula ingkeng sowan Den Mas.

02. RADEN MAS CONTRENG

( Radi kaget ) Eh,.. ?! Sliramu Sapar ? Kene,kene lungguh kene.

03. SAPAR

( Alus ) Injih sampun Den Mas. Wonten mriki kemawon.

04. RADEN MAS CONTRENG

E,... ora apa-apa. Kene lungguh kene. ( Sapar lajeng kenggah kursi )

Ana apa Sapar ? Kok sajak ana wigati.

05. SAPAR

Injih nyuwun pangapunten Den Mas. Sowan kula menika bade nglarapaken Glowah.

06. RADEN MAS CONTRENG

Glowah kuwi sapa ?

07. SAPAR

Glowah menika tiyangipun kang Suro. Menapa kepareng kula undhang mriki kemawon supados matur piyambak wonten ngersa panjenengan Den Mas.

08. RADEN MAS CONTRENG

Yo wis timbalana sowan mrene.

Sapar lajeng nyowanaken Glowah-Gloweh saha Rimang.

09. SAPAR

Menika Den Mas

10. RADEN MAS CONTRENG

( Radi ngungun ) Lo, ? Kowe menawa ora kleru abdine Suro ta ?

11. RIMANG

Injih leres Den Mas.

12. RADEN MAS CONTRENG

La, Glowah sing diaturke Sapar kuwi sing endi ?

13. GLOWAH

Kula Den Mas.

14. RADEN MAS CONTRENG

Banjur arep dhuwe wigati apa kowe sowan aku.

15. GLOWAH

Injih nyuwun pangapunten Den Mas. Yek-tosipun kula bade nyuwun iguh pertikel amrih kula mboten kecalan anak.

16. RADEN MAS CONTRENG

Kosik ta. Nalare kuwi kepiye kok nganti arep kelengan anak ?

16. GLOWAH

Anak kula menika nyuwun supados kula nglamaraken. Kamangka ingkang kapurih nglamar menika anakipun ndara Suro. Menapa injih kelampahan ndara Suro menika bade mangestoni lan marengaken anakipun pikantuk anak kula.

17. RADEN MAS CONTRENG

Apa wis tok coba kowe kandha karo Suro ?

18. GLOWAH

Dereng Den Mas. Nanging anak kula menika malah sampun kadenangan menawi sambet tresna kaliyan Sari anakipun ndara Suro.

19. RADEN MAS CONTRENG

( Kaget ) Dadi Sari yogane Suro kuwi sambung tresna karo anakmu ta ?

Lha sak-iki endi anakmu ?

20. GLOWAH

( Nuding Rimang ) Menika anak kula Den Mas. Rimang naminipun.

Den Mas Contreng mlenggong nyawang Rimang sak-sampunipun ngertos Rimang menika pacanganipun Sari. Glowah mendhel sekedhap.

Lajeng,....

21. RADEN MAS CONTRENG

( Cepet nyahut - Exspresif ) Terus, terus !?

22. GLOWAH

Lajeng ndara Suro nesu. Rimang dipun usir. Menika aturipun anak kula Den Mas.

Kamangka Rimang aumpah luwung pejah menawi mboten kelampahan gesang bebrayan kaliyan Sari. Menapa menika mboten ateges kula bade kecalan anak.Den Mas. Pramila sumangga kula pasrah amrih saenipun Den Mas.

23. RADEN MAS CONTRENG

Hiya ngono apa, Rimang ?

Sapar lejeng matur dhateng Den Mas Contreng. Alon kados bisik-bisik

24. SAPAR

( Alon ) Nyuwun pangapunten Den Mas. Rimang menika nem-neman ingkeng dipun suyuti tiyang-tiyang Banaran nem, menapa dene sepuh.

25. RADEN MAS CONTRENG.

( Alon – Mantep – Cetha ) Nanging kuwi perkara sing ora ana sambunge karo anggonku nggayuh dampar Nogo Bonbdho, Sapar ?!

26. SAPAR

( Alon – Cetha ) Wonten Den Mas. Menawi penjenengan kecalan Rimang sami kemawon penjenengan kecalan tiyang ingkeng bade nyengkuyung penjenengan.

Kamangka banaran menika kekiyatan penjenengan anggen penjenengan bade nggayuh dampar Nogo Bondho. Menawi kula saenipun injih dipun iguhaken. Manawi mboten, Nandalem piyambak ingkeng tuna.

27. RADEN MAS CONTRENG

( Mendel – Menggalih lebet ) Yen ngono timbalan Suro lan Sari supaya ngadhep aku.

Kowe kabeh tak keparengake sesingidan ana ing pungkuran dhisik kana.

Glowah-gloweh lan Rimang mlebet. Sapar dhateng kaliyan Suro lan Sari.

29. RADEN MAS CONTRENG

Mestine kowe kaget ndhak timbali supaya nganti Sari. Ca blaka wae Suro. Aku sak-wise mriksani lan ngerti menawa Sari kuwi yogamu. Aku banjur kepingin mundhut mlebu Sari ana ing Kapangeranan. Piye Suro. Apa kowe nglilakake Sari tak pundhut mlebu ana ing Kapangeranan ? Yen ora tok ulungake. Ya ora apa-apa ? nanging nyen kowe lila ngulungake Sari, ya sing iklas tulusing bathin.

30. SURO

( Mantep ) Sak-glugut kolang-kaling pinara sosro  manah kula mboten bade nolak pangandika dalem. Kula namung pasrah sumangga kersa menawi sak-estu penjenengan ngersakaken anak kula mlebet wonten ing Kapangeranan. Den Mas. Sumangga kula ulungaken kanti tangan kula sekawan.

31. RADEN MAS CONTRENG

Yoh tak trima banget aturmu. Iki disekseni Sapar. Lan sing baku sineksenan Gusti allah.

Kandhamu kowe ikhlas lahir bathin Sari tak pundhut.

32. SURO

( Mantep ) Sak-estu Den Mas.  Kula iklhas lahir bathin Sari penjenengan kersakaken. Sumangga bade penjenengan dadosaken juru dhang juru penginang kula iklhas !

33. RADEN MAS CONTRENG

Yen ngono sak-iki resmi Sari tak pundhut. Wis pasrah tenan ta ? Ora gela ?

34. SURO

( Samsaya mantep ) Mboten Den Mas ! Sak-estu lila legawa iklhas lahir bathin.

35. RADEN MAS CONTRENG

Nek pancen ngono Sari dadi wewenangku. Sari kowe wis mireng ta. Yen kowe wis diparingake aku. Merga kersaku kepingin mundhut, kowe. ( Sari namung mendel )

Sapar, timbalanan tamuku kae mau. ( Suro kaget Rimang  wonten kapangeranan )

Kowe wis tepung apa, karo tamuku iki ? Kok katone kaget sak-wise ngerti.?

34. SURO

( Alon – Getem-getem ) Sampun Den Mas. Menika batur kula.

35. RADEN MAS CONTRENG

Sapar, Glowah-Gloweh lan kabeh sing ana ing kene. Kowe kabeh minangka seksi menawa dina iki. Kanti resmi Sari bakal tak Dhaup, ke karo Rimang.!  Sarujuk  ?!

Sedaya sami sarujuk. Namung Suro ingkeng mboten sarujuk.

36. SURO

( Mantep – ngadhek ) Aku ora sarujuk. ! Anakku di dhaupke karo gedibalku !

37. RADEN MAS CONTRENG

Suro. Ing ngarep kowe wis ngulungake Sari kanti iklhas marang aku. Dadi sak-iki Sari wis dudu wewenangmu. Nanging aku sing wenang dhawuh Sari.

38. SURO

( Mantep ) Nanging menika namung akal-akalan Den Mas.  Penjenangan namung bade damel dolanan kula. Penjenengan sengaja mirang-mirangaken kula ! Sumpah kula Sari mboten bade kula dhaupaken Gedibal ala menika ! Kula akeni manawi Sari sampun kula caosaken penjenengan !. Pramila kula ugi mboten bade selak. Nanging ginanipun menapa kula nyengkuyung penjenengan menawi penjenengan sampun natoni ati kula. Pramila wiwit dinten menika kula mboten bade nyengkuyung penjenengan nggayuh Dampar Nogo Bondho ! Jalaran kula ugi wenang lenggah dampar Nogo Bondho.
wiwit dinten menika kula ugi bade nggayuh panguwasa !

R A M P U N G