FRAGMEN KETHOPRAK ......SEKAR PEMBAYUN......

ADEGAN                  : KA I. INTRODUCING

SWASANA                :

IRINGAN                  :

PROPERTI               : KURSI RAJA (1), KURSI BAKSO (2)

PARAGA                  : 1. KANJENG PANEMBAHAN

                                      2. KI JURU MERTANI

  3. SEKAR PEMBAYUN

KATRANGAN         : Kanjeng Panembahan tansah rengu ing penggalih. Awit salah setunggaling kukuban Metaram wonten ingkang balela. Nenggih wewengkoning Mangir Wanabaya. Banjur putrinipun, Sekar Pembayun, dados srana nungkulaken Mangir Wanabaya.

K.PANEMBAHAN

Pembayun..!

SEKAR PEMBAYUN

Kula Penembahan...

K.PANEMBAHAN

Kowe daktimbali marak, merga arep dakparingi dhawuh.

Wanabaya kuwi balela, ngukuhi bumi mangir anggone dadi bumi perdikan. kowe kudu ngerti yen ngene iki dadi kilip mungguhing Metaram.

SEKAR PEMBAYUN

Lajeng kados pundi Penembahan?

K.PANEMBAHAN

Aku borong kowe. Waton Mangir nungkul kanthi aris, Pembayun.

SEKAR PEMBAYUN

Hadhuh....Kok dumugi penggalih Dalem, utusan kula ngangge cara mekaten.

Nyuwun sih pangapunten Dalem. Awrat sanget anggen kula badhe nglampahi jejibahan

Menika. Kula putra Dalem piyambak, Kula putra Dalem piyambak Penembahan...!!!

K.PANEMBAHAN

Merga kowe putraku dhewe Pembayun. Mula......

SEKAR PEMBAYUN

Lepat nyuwun sih pangapunten Rama.

Menapa Metaram sampun boten wonten satriya, menapa Metaram sampun kecalan jago?

Ingatase wanita kok dipunutus nungkulaken mengsah.

K.PANEMBAHAN

Pembayun!!! Keladuk, aturmu!!!

KI JURU MERTANI

Sampun Panembahan..

Wayahku Pembayun, mangertia yen ta nungkulaken mengsah menika caranipun maneka

warni. Wonten ingkang ngangge cara perang lan wonten ingkang ngangge cara kados

mekaten. Badhe dipunserat ngangge mangsi emas bebasanipun, naminipun peprangan

menika bakal awon wusananipun, kathah wutahing ludira, wayahku..

K.PANEMBAHAN

Rontang-rantinging pengalihku, Pembayun. namung sagedhakan iki darma baktimu

dakpundhut.

SEKAR PEMBAYUN

Menapa Sampeyan Dalem boten mengalih, menawi sumyuring ajining dhiri kula badhe

ngembet luhuring asma Dalem..   Awrat..awrat sanget Panembahan. Aluwung kula

kapejahana, tinimbang wirang nggubet awak kula.

KI JURU MERTANI

Wayahku, boten maiben yen  penjenengan awrat ngemban dhawuh rama dalem

menika. Wanita ingkang netepi jejer menggahing wanitanipun mesthi badhe ndhepani

kaurmatanipun.

SEKAR PEMBAYUN

Kados pundi Eyang Juru Mertani? Kados pundi kula badhe mentala kemawon menawi

mustikaning wanita kula badhe dipunmangsa dening mangir wanabaya..? Kados Pundi

eyang?

KI JURU MERTANI

Panjenengan mukti awit saking nampi tempilan kamuktening rama Dalem. Lha

samenika luhuring asma rama dalem badhe kusut, kawibawanipun rama dalem badhe suda,

minggahipun malih, kuncaraning negari dalem badhe risak. Mekaten wau awit pokalipun

Mangir Wanabaya, wayahku. Menapa panjenengan boten badhe kesempyok, menapa

panjenengan badhe mentala?

SEKAR PEMBAYUN

Lajeng kula kedah kados pundi eyang juru?

KI JURU MERTANI

Prayoginipun dhawuh rama dalem menika dipunsendikani, wayahku.

SEKAR PEMBAYUN

Panembahan..menawi pancen timbalaning kaluhuran, saha kuncaraning asma, menapa dene

negari Dalem, kedah sinorohan ajining dhiri kula, inggih..ingih.. Kula sendikani dhawuh

Dalem, Panembahan..

K.PANEMBAHAN

Kowe saguh Pembayun?

SEKAR PEMBAYUN

Sagah rama....

K PENEMBAHAN

Wah, ayu tenan kowe Pembayun. Yen ngono aja kesuwen. Tatanen karo abdimu, enggal budhala.. Pembayun..

SEKAR PEMBAYUN

Tambahing pangestu penembahan.

Donga pamuji Ki Juru Mertani mugi tansah jampangi lampah kula..

KI JURU MERTANI

Inggih, mugi tanpa sikara Kanjeng Ratu.

ADEGAN                  : II

SWASANA                : GAYENG

IRINGAN                  : SIGRAK

PROPERTI               : KURSI BAKSO (3)

PARAGA                  : 1. KI AGENG MANGIR WANABAYA

                                      2. KI DEMANG

  3. WARGA

  4. ROMBONGAN LEDHEK PEMBAYUN

KATRANGAN         : Ki Mangir sareng demang lan para warga saweg mirsari ledhek. Nenggih rombongan ledhek Sekar Pembayun utusan Kanjeng Panembahan.

(tekane rombongan ledhek) Kolaborasi Tari Ledhek

Dialog para warga improv “Sing penting swasana urip lan gayeng”

Ki Ageng mangir ngantos boten kedhep anggenipun mirsani Pembayun mbeksan. Ngantos kraos semseming penggalih. Saya dangu sansaya kapilut, awit saking ayunipun Pembayun. Sareng sampun purna, para warga wangsul, lajeng Ki Mangir nyaketi Pembayun.

Sampure Pembayun tiba, banjur dipundhut Ki Mangir. Kedadak Pembayun uga melu jupuk sampure. Sanalika pepandengan catur netra antarane Ki Mangir lan Pembayun. (ilustrasi tembang)

KI AGENG MANGIR

Jenengmu sapa cah ayu?

SEKAR PEMBAYUN

Nami kula... sinten nggih..

KI AGENG MANGIR

Lho..ditakoni kok malah bali nakoni, piye ta?

SEKAR PEMBAYUN

Nami kula Sekar, Ki Ageng.

KI AGENG MANGIR

Kowe pancen pinter lelewa cah ayu. Wiwit sepisanan weruh, sejatine atiku wis geter.

SEKAR PEMBAYUN

Heleh, Ndak injih ta Ki Ageng? Mosok ah?

KI AGENG MANGIR

Apa pasuryanku iki ketok ngapusi ta?

SEKAR PEMBAYUN

Lha yen kula ki Ageng,

KI AGENG MANGIR

Piye wong ayu?

SEKAR PEMBAYUN

manah kula kraos mak nyeeess.. nalika kula nampi panyawang penjenangan..

KI AGENG MANGIR

Apa aku karo kowe iki wis pinesthi dadi jodho ya?

SEKAR PEMBAYUN

Sajakipun..... nggih Ki Ageng..

KI AGENG MANGIR

Yen ngono, apa kowe nampi dakpundhut garwa cah ayu....

SEKAR PEMBAYUN

Ki Ageng.. (banjur mlebu)

KI AGENG MANGIR

Sekar... (nututi Pembayun)

Bersambung..........................