NASKAH KETHOPRAK ...“DARPA – KAYUN”... Oleh : Sri Paminto Widi Legowo

ADEGAN I PAPAN                      : PIDALEMAN AGUNG PARAGA                  : PANGERAN DARPA               PANGERAN KAYUN               RATU SEPUH               DEMANG LOSARI               PATIH PATIH TOYAMERTA WANCI                      : DALU SUWASANA             : HENING / TEGANG

ISI ADEGAN

Pangeran Darpa badhe mblengket Praja Tumapel, namung Pangeran Kayun (kadangipun) mboten kepareng, lajeng dados daredah.

Antawecana :

1.      DEMANG LOSARI

Kanjeng Pangeran,.... kula Ingkang Sowan,

2.      PENGERAN DARPA

(noleh) Losari, . . sak wise aku lenggah ing dhampar maesa ndanu praja Singosari, lan kadangku dhimas Kayun nampa praja Tumapel, mungguh saka panemumu, piye ?

3.      DEMANG LOSARI

Menggah kula, menawi taksih kapitados, sampun pas, menawi nandalem nampi kanugrahan menika. Jalaran miturut sarasilah pararaton, namung putra  ingkang wredha, ingkang kagungan hak. Namun  emanipun, bab Tumapel kula ingkang kirang mathuk.

4.      PENGERAN DARPA

Dhasare???

5.      DEMANG LOSARI

Pangeran Kayun menika taksih mudha tumaruna, lan kirang wasis ing babagan kaprajan, lho . . .kok badhe nyepeng negari, menapa mboten badhe kocar-kacir mangke? cobi ta penjenengan penggalih..

6.      PENGERAN DARPA

(mikir, ngangen-angen) Losari.., kaya bener atur mu .

7.      DEMANG  LOSARI

Lha inggih . . .

8.      PANGERAN DARPA

Nanging.., kabeh mau wis mujudake wohing parepatan kang disekseni kabeh para kawula.

9.      DEMANG LOSARI

Menika leres pangeran, namung nandalem menika kadang sepuhipun, gantine wong tuwa, menapa badhe tega lan mentala mriksani kadang ingkang kecalan kawibawanipun , mangga. . .  mangga dipun penggalih.

10.  PENGERAN DARPA

Yen ngono, sowana ing ndalem kapengeranan, matura marang dhimas pangeran Kayun, yen tak timbali.

11.  DEMANG LOSARI

Sendika dhawuh kanjeng. . .

12.  PENGERAN KAYUN

(mlebet) . . .  kangmas . . .

13.  PENGERAN DARPA

Dhimas, kene. . .  kene . . . lenggaha.

14.  PENGERAN KAYUN

Inggih kangmas,

15.  PENGERAN DARPA

Iki ngene dhimas, ana  bab kang wigati kang perlu tak rembug klawan sliramu.

16.  PENGERAN KAYUN

Babagan menapa kangmas?

17.  PENGERAN DARPA

Tumapel, . . .

18.  PENGERAN KAYUN

Tumapel???

19.  PENGERAN DARPA

Bener. . . merga ngene dhimas, saka pamawasku sliramu kuwi isih mudha, durung wasis ing babagan kaprajan. Mula, aku nduwe panemu yen sliramu sawetara iki mempengen nggomu sinau olah kaprajan. Dene tumapel ben dadi siji dhisik klawan Singosari, awit . . .

20.  PENGERAN DARPA

(munggel-cepet) Mangke rumiyin kangmas. . .  kula matur sewu nembah nuwun dhateng penjenengan, dene sematen agengipun anggen penjenengan migatosaken dhateng kula. Namung menawi prekawis bumi Tumapel, nuwun sewu kangmas, mboten kok kula mboten pitados dhateng penjenengan. Nanging, rehning Tumapel menika sampun sah dados hak kula, mila . . . kanthi sabiyantunipun sesepuh – sesepuh Tumapel, kula badhe sinau tataning kaprajan, ngiras pantes mengkoni praja Tumapel.

21.  PENGERAN DARPA

Dhimas, jebul kowe durung tanggap karepku ta? aku iki ora arep ngukuhi hakmu dhimas, ning rehning aku kuwi ngepenginake Singosari lan Tumapel tetep wutuh kaya nalika den asta rama Prabu , mula . . .

22.  PENGERAN KAYUN

(munggel-cepet) Nuwun sewu kangmas, kula ngertos menapa ingkang penjenengan kersakaken , namung. . .

23.  PENGERAN DARPA

(munggel-cepet) Kayun?? kowe iki adhiku, lan aku gantine wong tuwamu, wis sakmesthine yen aku nduweni wajib nata marang kowe. Merga yen ora, teges aku ora ngestokke sabdane rama Prabu.

24.  PENGERAN KAYUN

Menawi penjenengan ngestokaken dhawuhipun rama Prabu, kenging menapa taksih ngusik prekawis bumi Tumapel, ing mangka . . . .

25.   PENGERAN DARPA

(munggel-cepet) Cukup!!! wis ora ana gunane aku rembugan klawan kowe, mula, wiwit dina iki, Tumapel tang blengket dadi siji klawan Singosari.

26.  PENGERAN KAYUN

Hmm.. nggih... kangmas, menika kersa penjenengan, nanging menawi kula kukuhi, penjenengan badhe napa. . . ? ?

27.  PENGERAN DARPA

Badhe napa..?? keparat!!! . . . (ngunus pusaka)

(Pangeran Kayun lolos nilaraken Pendhapi ) .

28.  DEMANG LOSARI

( majeng ) sampun... kersanipun minggat, Pengeran. bocah ra nggugu ngendikane wong tuwa, . . .

(Kedadak mlebetipun Ratu Sepuh)

29.  RATU SEPUH

( mlebet ) Losari . . .  ngomong apa kowe??

30.  DEMANG LOSARI

(ajrih ) . .. . anu . . .  namung . . . pangeran . . .

31.  RATU SEPUH

Darpa, . . . ana apa?

32.  PENGERAN DARPA

( gugup )  mbot. . . mboten . . . wonten menapa-menapa ibu . .

33.  RATU SEPUH

Ora susah mbok tutup-tutupi, neng ngendi adhimu Kayun?

34.  PENGERAN DARPA

Piyambakipun lolos, badhe nilaraken Singosari.

35.  RATU SEPUH

Dhasare? dhasare apa Darpa . . ayo jawab?

36.  PENGERAN DARPA

( sareh ) . . .  ibu, mangga ta kula aturi sumeleh ing galih, kula namung .. .

37.  RATU SEPUH

(munggel-cepet) Ngerti.... aku ngerti, apa sing mbok karepake. Nanging caramu kuwi nistha ngger.., ora wicaksana. Adhimu ben sinau  mikir, ben dewasa, aja mbok watesi. . .

38.  PENGERAN DARPA

Mboten! kula mboten matesi, kula menika namung badhe mernahaken supados piyambakipun menika mboten kecalan kawibawan ing mangkenipun.

39.  RATU SEPUH

Ning nek caramu kuwi kaya ngono, kuwi ora ateges kowe ngeman kadangmu , nanging arep nguwasani Tumapel, mesthi wae adhimu ora rila.

40.  PENGERAN DARPA

Hm, . . . ibu, sak sampunipun kula ngraosaken ngendika penjenengan kala wau, kok ketingal sanget bilih ibu menika milahaken ing antawisipun kula kaliyan dhimas Kayun.

41.  RATU SEPUH

Kuwi kliru, . . .ora ana wong tuwa ngepinginake putrane pada regejegan, apa meneh mung perkara warisan. Mula tekaku iki mung bakal nyethakake lamun aku iki ibumu, ibune bocah loro kang bakal paring pitutur klawan kowe ngger, merga kowe lagi lali. Dadi wis ora perlu kowe cawe-cawe bab Tumapel, pikiren prajamu dhewe, aja ngumbar kamurkanmu.

42.  PENGERAN DARPA

Ibu..!!

43.  RATU SEPUH

Yen kowe tetep mbacut, aku kang bakal mepalangi. . .

44.  PENGERAN DARPA

Ibu. . . .sak menika ngaten kemawon, sedaya namung gumantung penjenengan, menawi ngayogyani kula mblengket Tumapel dados setunggal kaliyan Singosari , . . ibu taksih saget ndherek mukti ing ngriki, nanging, menawi  penjenengan tetep mbalui Kayun anggenipun ngukuhi Tumapel. . . mangga . . .  kayun dereng tebih, korining gapura kraton dereng kula tutup. . .

45.  RATU SEPUH

Bagus, . . Bagus ngger..! ! tanpa kowe nundhung aku, aku bakal sumusul putraku kayun, merga mung dheweke minangka pangayomanku ing tembe. Mung wae. .  pandongaku, muga-muga rahayu nggonmu nyekel praja Singosari. . . Wis . . kariya basuki. ( Ratu Sepuh Lolos ).

46.  PENGERAN DARPA

(kaget) ..Ibu,...!!!

47.  DEMANG LOSARI

(mlebet) Pengeran,..sampun ta mboten sisah nggelani kedadosan ingkang sampun kelampah...

48.  PENGERAN DARPA

Losari, trataban rasaning atiku, sakwise aku krungu sabdane ibu kang pungkasan mau.

49.  DEMANG LOSARI

Menawi sabdanipun ingkang Ibu menika penjenengan anggep supata, alaaaah....., mboten mandi,..niku kuna, kula pancen ngertos ingkang Ibu sumusul pengeran Kayun, lha ngaten menika rak ateges wong tuwa sing ora adil, mban cindhe mban siladan. Sampun, kersanipun kesah.. malah mboten ngebot-boti penjenengan.

50.  PENGERAN DARPA

Pancen bener aturmu Losari, sak lolose Kayun lan Ibu saka praja Singasari wis ora ana kang ngribeti penggalihku.

51.  DEMANG LOSARI

Mangke rumiyin,...penjenengan mboten priksa,...nanging kula ingkang ngertos, taksih wonten tunggak kemadhu ingkang thukul ing praja Singasari menika.

52.  PENGERAN DARPA

sapa...??

53.  DEMANG LOSARI

Taruna...

54.  PENGERAN DARPA

Taruna....??

55.  DEMANG LOSARI

Inggih, piyambakipun menika taksih kadang penjenengan, putranipun keng rama ingkang lair saking garwa peteng, lajeng katitipaken dhateng kepatihan ngantos sak menika dewasa.

56.  PENGERAN DARPA

Banjur saka karepmu?

57.  DEMANG LOSARI

Kedah dipunsingkiraken,...awit menawi mboten mbebayani tumrap palenggahan ndalem ing Singosari ngriki.

58.  PENGERAN DARPA

Yen ngono, timbalana Patih PATIH TOYAMERTA.

59.  DEMANG LOSARI

Ngestokaken dhawuh... (nyembah mundur).

60.  PATIH PATIH TOYAMERTA

(mlebet) .... kula sowan kanjeng ...

61.  PENGERAN DARPA

Kaget, penjenengan kula timbali paman ...?

62.  PATIH PATIH TOYAMERTA

Mesthi kemawon Pengeran, jalaran mboten nate penjenengan nimbali kula ing wanci ndalu, wonten wigatos menapa, Kanjeng ...?

63.  PENGERAN DARPA

(ngumus pusaka) ... paman, mangga kula aturi nampi pusaka menika.

64.  PATIH PATIH TOYAMERTA

Kersanipun?

65.  PENGERAN DARPA

Kula ngersakaken sirnanipun tunggak kemadhu ing ndalem kapatihan, ...(nilaraken pidaleman).

66.  PATIH PATIH TOYAMERTA

(ningali Losari, lajeng medal).

ADEGAN II PAPAN                                  : ALUN-ALUN PARAGA                              : TUMENGGUNG MARTA NEGARA (TUMAPEL)                                          RATU SEPUH                                        TUMENGGUNG SURYADIPA (SINGOSARI)                                        PRAJURIT TUMAPEL                                        PENGERAN KAYUN                                        PRAJURIT SINGOSARI WANCI                                  : DALU          SUWASANA                         : TEGANG

ISI ADEGAN

Tumenggung Martanegara, Tumenggung Suryadipa lan prajurit sami daredah

Antawacana :

67.  TUMENGUNG SURYADIPA

MARTANEGARA, lagi apa ing papan kene?

68.  TMG. MARTANEGARA

(sinis) apa perlu kowe ngerti?

69.  TUMENGUNG SURYADIPA

Ya gene ora, jalaran iki tanggunng jawabku, njaga katentremaning praja Singasari sak wise jumeneng. Apa maneh kowe kalebu siji ing antarane punggawa kang ora sarujuk, klawan pranataning praja kang anyar.

70.  TMG. MARTANEGARA

Mesthi wae, jalaran pranataning negara saiki wis rusak, beda klawan nalika den asta dening  sinuwun Prabu Sindunegara sak durunge seda. Jajal rasakna pendhak-pendhak ana kawula cilik kang duwe kaluputan, mesthi gedhe pidanane, nanging lamun ana punggawa praja kang nerak pranatan, malah diayomi dening negara. Apa ngono kuwi patut disuyuti, mula, ora tak selaki nggonku cumondhok ing papan kene bebarengan klawan kabeh para prajurit  lan kawula, nyraosi kanjeng pengeran Kayun, arsa boyong neng Tumapel.

71.  TUMENGUNG SURYADIPA

Yen ngono rehning iki dadi larangane negara, sapa wae ora dikeparengake metu tanpa palilah Dalem Kanjeng Pengeran Darpa. Mula, kowe kudu manut tak sowanake ing pendhapa.

72.  TMG. MARTANEGARA

Kene!!, ... nek kowe bisa ...

73.  TUMENGUNG SURYADIPA

Hee,  ....prajurit, ....cekel ....

(Perang, dhatengipun pengeran Kayun).

74.  PENGERAN KAYUN

(keras) Mandheg.....apa perkarane ....?

75.  TMG. MARTANEGARA

Pengeran, piyambakipun badhe nyepeng kula sak kanca lan badhe kaseret ing pendhapi.

76.  PENGERAN KAYUN

(noleh Suryadipa) ...bener...?

77.  TUMENGUNG SURYADIPA

Kula jejering kawula ingkang ngetokaken dhawuhing ratu.

78.  PENGERAN KAYUN

Sira kabeh ora salah, merga kowe suryadipa, nindakake kuwajibanmu, lan sira Martanegara ngestokaken dhawuh. Mula, Suryadipa, yen kowe nyengkuyung kangmas pengeran Darpa, tetepa ing Singasari, dene keng tuhu tresna marang aku, ayo ndhereka aku menyang Tumapel.

79.  RATU SEPUH

(mlebet kaliyan nangis) ..

Oh Kayun, ibu ndherek sliramu wae ngger....

80.  PENGERAN KAYUN

(bingung) wonten menapa Ibu....wonten menapa....

81.  RATU SEPUH

Aku ditundhung kangmasmu ngger....

82.  PENGERAN KAYUN

Keparat.....Darpa...

(badhe njangkah dipun gondheli Ratu Sepuh).

83.  RATU SEPUH

Aja ngger...aja... kangmasmu lagi kepanjingan iblis, ayo ibu kanthinen wae ing Tumapel....

84.  PENGERAN KAYUN

Menawi ngaten ....mangga ibu....

ADEGAN III PAPAN                      : DALEM KEPATIHAN PARAGA                  : ABDI                                       TRUSTI                                       TARUNA                                       NYI PATIH                                       PATIH TOYAMARTA                                       PANGERAN DARPA                                       DEMANG LOSARI WANCI                      : ENJANG SUWASANA                         : CERIA /TEGANG

ISI ADEGAN           

Kepatihan dhatengipun Pengeran Darpa lan Demang Losari

Antawacana

Abdi nembang, nglipur trusti..

85.  TRUSTI

(mlebet, abdi mandheg)  lho, kena apa kok mandheg, terusna....

86.  ABDI

(isin) ....ah...mboten....

87.   TRUSTI

Ora apa-apa Biyung, aku malah bombong, lamun biyung isih gelem sinau bab olah seni suara. Awit iku kalebu ahli kagunan, kang naluir wae memetri klawan adege kagunan mau, jalaran ahli kagunan iku klebu ing wewengkone kabudayan, lan kabudayan iku minangka ukuraning bangsa. Dadi luhur lan asor drajating bangsa bisa kaukur saka kabudayane.

88.  ABDI

Waahh, ...penjenengan thik wasis temen leh, Gusti putri.

89.  TRUSTI

Ya gene ora, ....putra Patih jare, ...apa maneh pemerintah saiki lagi mempeng-mempenge mangun negara, murih rahayuning para kawula. mula, ayo padha disengkuyung supaya enggal bisa dirasakake asile.

90.  ABDI

Mesthi kemawon gusti putri, bojo kula kemawon nembe kula bangun, alise kula kerok, rambute kula brodholi, lajeng kula tumbaske ban vespa, kula emoh ketinggalan jaman ta, jamane empun maju.. hehe....

91.  TRUSTI

Ya senajan kaya ngono aja nganti  ninggalna adat ketimurane, wong jawa kuwi aja nganti ilang jawane.

92.  ABDI

Ning wong jawa sakniki niku pun padha minger keblate, tegesipun rame ing pamrih sepi ing gawe, cetha nek kleru nggih dianggep bener mawon. Ning nyatane jaman lagi jaman kala bendu, kepripun malih, sakniki niku nek wonten perkara bingung yen badhe njaluk pengadilan, makmur pancen makmur, nanging adile sing dereng.

93.  TRUSTI

Sssst. . . . aja sembarangan lho, yen kepireng pengeran Darpa bisa dipidana kowe mengko.

94.  ABDI

Nanging menika ungkapan hati nurani gusti putri . . .

95.  TRUSTI

Biyung, jebul kowe yo pinter, apa kowe sinau pralambang jaman?

96.  ABDI

Inggih ta, wong kula niki turas turuning pujangga kok.
( kesaru dhatengipun bagus Taruna ).

97.  TRUSTI

Dhimas Taruna , saka ngendi wae . . . ?

98.  TARUNA

Nengga rama kok ora kondur-kondur kang mbok. . . .

99.  TRUSTI

Lha wong rama Toyamarta iki jejering patih , . .  pati-pati ditimbali ya mesthi ana dhawuh kang kudu ditindakake dhimas...

100.   TARUNA

Kuwi bener kang mbok, nanging wong tindake kuwi mau bengi kok nganti saiki durung kondur.

101.   TRUSTI

Mengko sedhela maneh rak ya kondur.

102.   TARUNA

Alaah..penjenengan kuwi mung nglipur atiku wae kang mbok. . ..

(sinambi medal).

103.   ABDI

Wah, pancen gus Taruna menika tresnanipun kalian ingkang rama ngedap-edapi sanget..

104.   NYI PATIH

ana apa Trusti. . . ?

105.   TRUSTI

Menika kala wau lho bu, dhimas Taruna

106.   NYI PATIH

Hmm,. . .  ora maido, awit . .

107.   TRUSTI

Ibu, . . .  menika rama rawuh..

(Dhatengipun Patih PATIH TOYAMERTA) 

108.   NYI PATIH

(majeng ) Kang mas, mangga kula aturi pinarak. . .

(noleh dateng trusti, trusti lan abdi medal)

kang mas , . .  sak sampunipun lenggah kula badhe miterang, menapa ta wigatosipun dene ing wanci dalu penjengan tinimbalan ing pendhapi agung. . . ?

109.   PATIH PATIH TOYAMERTA

(mlebet) aku nampa kanugrahan dhiajeng.. jalaran aku pinaringan pusaka Dalem pepundhen ing praja Singosari.

110.   NYI PATIH

Kersanipun . . . ?

111.   PATIH PATIH TOYAMERTA

Supaya ngisas tunggak kemadhu kang ana dalem kepatihan . . .  (nyi Patih kaget).

112.   NYI PATIH

( bingung ). . .  tunggak kemadhu ...? Taruna kang mas . . .?

113.   PATIH TOYAMERTA

Bener dhiajeng. . .

114.   NYI PATIH

( kaget ) oh ..  lajeng penjengan?

115.   PATIH TOYAMERTA

Aku kawula, sing kudu ngestokake dhawuhing ratu.

116.   NYI PATIH

Menika leres kang mas, nanging menika dhawuh kang ngayawara, ingkang mboten saget enggal katindakaken . . .  awit . . .

117.   PATIH TOYAMERTA

Aku kalah panguwasa dhiajeng, lamun aku ora nindakake dhawuhing pengeran Darpa, aku mesthi bakal nampa pidana.

118.   NYI PATIH

Namung semantena kang mas, Taruna menika anak kula, putra penjenengan, senajan namung titipan. Nanging anggen kita nglelithing, nggula wenthah menika wiwit tasih alit kang mas, . . . menapa penjenengan badhe tega, badhe mentala merjaya putra piyambak, kang mas?

119.   PATIH TOYAMERTA

Dhiajeng . . .  semono gedhene katresnanmu marang Taruna,  . . . lan kuwi ora ana bedane klawan katresnanku , . . .  ning yen aku kudu ngiris daging kang tumempel ning saliraku, . . .  njur piye nggonku bakal nglakoni dhiajeng?

ah. . .mbok menawa wae , iki wis dadi garis pepesthen geraking kodrat. . .

120.   NYI PATIH

Kodrat saget dipun wiradati , mboten. . .  kula mboten saget pisah kaliyan Taruna. . .  mboten kang mas. . .

Ngebat keris, badhe mbalik dipun tubruk Taruna

121.   PATIH TOYAMERTA

  Taruna anakku ngger. .  . (Nangis)

(Dhatengipun Pengeran Darpa, Demang Losari).

122.   TARUNA

Rama lan ibu . . . mboten sisah kaget utawi ngungun,. . .  jalaran menika pancen kula sengaja . awit samenika kula ngertos, . . .  jebul kula sanes putra penjenengan, kula namung bocah buwangan ingkang lair saking garwa peteng ingkang namung pantes dipun bucal . . . mila. . .  gunging panuwun kula tanpa upami. . .  dene penjenengan sekaliyan , rama lan ibu sampun nyisihaken wekdal kangge ngupakara , momong kula ngantos dewasa. Lajeng menapa atur piwales kula dhateng penjenengan. . .  menawi mboten namung nguwali penjenengan saking pidana.

( jumeneng nyateti pengeran Darpa )

Gusti pengeran Darpa, kula suwun rama lan ibu ampun ngantos kapidana , jalaran kula ingkang penjenengan anggep klilip sampun mboten badhe wonten ing jagat raya menika. Rama. . .  ibu. . .  , nyu. . .wun. . pa. . miiiit. . .

( Taruna pejah ).

123.   NYI PATIH

(njerit). . .  Tarunaaaaaaa. . ...

124.   PENGERAN DARPA

Paman Toyamerta , kaya bener ature Losari lamun kowe kudu tetep nampa pidana.

125.   PATIH TOYAMERTA

Dhasaripun.?? Dhawuh penjenengan sampun kula estokaken. . . Taruna sampun pejah. . .

126.   PENGERAN DARPA

Patine Taruna mung sengaja , dheweke lampus dhiri. . .  ora saka tanganmu, mula . . .  iki wis dudu perkara ilange tunggak kemadhu ing Singosari, nanging kawula kang ora ngestokake dhawuhing ratu.

127.   PATIH TOYAMERTA

Oh,. . . .pengeran ,. . . kula mboten badhe ngoweli gesang kula, menawi penjenengan kagungan kersa mekaten. . .  mangga . . .

128.   TRUSTI

( mlebet ) rama . .  ibu . .  wonten menapa. . . ?? ( noleh dhateng Taruna ). . .  dhimas . .  dhimas Taruna . .  wonten menapa kaliyan dhimas Taruna ibu. . . ?

129.   NYI PATIH

Kabeh iki mung saka kersaning pengeran Darpa. ( Trusti noleh dhateng pengeran Darpa ).

130.   PENGERAN DARPA

(kepranan dhateng Trusti ). . . paman tak uwali saka pidana . .  nanging aku ngersakke putrimu. . .  Trusti.

131.   TRUSTI

( noleh ) apa . . . ?? pengeran Darpa,  kowe dudu ratu ing Singosari . . .  nanging iblis Singosari. .

( nilaraken pendhapi ).

132.   PATIH TOYAMERTA

( kaget )  . . .  Trusti . .  !!

133.   PENGERAN DARPA

Paman, . .  aku butuh Trusti tak boyong dina iki ing Singosari

( Nyi patih medal, lajeng mlebet malih )

134.   NYI PATIH

kang mas,  . .  Trusti minggat, . .

135.   PATIH TOYAMERTA

Apa?

136.   DEMANG LOSARI

Pengeran. . . napa nandalem pitados?? menika paling namung gawe-gawe.

137.   PENGERAN DARPA

Uwal lan orane pidanamu mung gumantung Trusti, . .  prajurit? ..

138.   PRAJURIT

Dhawuh dalem pengeran.

139.   PENGERAN DARPA

Seret Toyamarta sak garwane, lebokke pakunjaran.

140.   PRAJURIT

Sendika  . . 

(nyeret toyamarta lan garwa )

141.   NYI PATIH

(nangis ).. . Taruna , . . .Taruna . . .

142.   DEMANG LOSARI

Hmm, . . .  modar kowe,. . . .(Nyadhuk Taruna)

ADEGAN IV PAPAN          : PAKUNJARAN PARAGA      : PATIH PATIH TOYAMERTA                           NYI PATIH                           TRUSTI                           PRAJURIT                           PANGERAN DARPA                           DEMANG LOSARI WANCI          : DALU SUWASANA             : HENING / TEGANG

ISI ADEGAN

Prajurit jagi pakunjaran, lajeng dhatengipun Trusti

ANTAWECANA

143.   PRAJURIT

Sapa kowe . . . ??

144.   TRUSTI

Kula abdinipun gusti pengeran Darpa.

145.   PRAJURIT

Karepmu. . . ??

146.   TRUSTI

Kinen nyaosaken unjukan menika , . . awit penjenengan dipun anggep prajurit ingkang tansah ngestokaken dhawuhipun.

147.   PRAJURIT

O. . .  ya. . ya . .  kene. . kene . . (sami mabuk )

(Toyamarta  lan garwa dipun luwari TRUSTI)

148.   PANGERAN DARPA

He. . . ! ! padha  tangi . .  lagi pada apa kowe??

149.   DEMANG LOSARI

( Majeng ). .  wah sami mambet tuak pengeran . .

150.   PANGERAN DARPA

. . . Tangekna. .!!

151.   DEMANG LOSARI

He. . . ! ! padha  tangi . .  ayo pada tangi . .  lagi pada apa kowe??

152.   PRAJURIT

Kala wau wonten utusanipun pengeran Darpa, ingkang maringi tuak menika

153.   PANGERAN DARPA

(nyepeng prajurit ). . . sapa . ?? he.. Losari, tilikana pakunjaran. .

154.   DEMANG LOSARI

(medal, mlebet malih ) . . waduh, . ketiwasan pengeran ..  pakunjaran bobol.

155.   PANGERAN DARPA

Hee. . . keparat . .  !! ( duka dhateng prajurit )

156.   DEMANG LOSARI

Pengeran , mboten wonten  ginanipun penjenengan duka dhateng tiyang-tiyang menika, . .  ingkang baken. . mumpung durung tebih , .  mangga dipun bujung.

(Pengeran Darpa, Demang Losari, Prajurit bidhal mbujung mlajaripun Trusti)

ADEGAN V PAPAN                      : MARGI PARAGA      : PATIH PATIH TOYAMERTA               NYI PATIH               TRUSTI               DEMANG LOSARI               PANGERAN DARPA                   WANCI          : DALU SUWASANA             : TEGANG

ISI ADEGAN
Trusti mlajar dipun bujung pengeran darpa

ANTAWECANA

157.   NYI PATIH

(nangis) . . . Trusti, . .  anakku ngger. .  (dipun rangkul ).

158.   TRUSTI

Rama lan ibu, samenika ngaten kemawon, murih mboten saget kabujung dening pengeran Darpa, lan sawadya balanipun, penjenengan sekaliyan kula aturi ngrumiyini lampah tumuju ing Tumapel .

159.   TOYAMATRA

Banjur kowe  . .??

160.   TRUSTI

Tetep ing papan menika , . nengga pengeran Darpa supados mboten mbujung penjenengan.

161.   NYI PATIH

Nanging ngger. . .??

162.   TRUSTI

Kula pitados, menawi Pengeran Darpa mboten badhe menapa-menapa, mila . . mumpung dereng caket, . .

163.   TOYAMARTA

sing ngati-ati ngger . . 

( Toyamarta lan garwa bidhal).

164.   PANGERAN DARPA

(mlebet). .  Trusti.  ?? jebul kowe kang mlebu jroning pakunjaran. . ??

165.   TRUSTI

Bener pengeran, . . merga aku butuh wong tuaku.

166.   PANGERAN DARPA

Yen  kuwi sing mbok karepake, ya gene kowe  ora blaka wae klawan aku, ora-ora..yen bakal dak kukuhi, jalaran aku butuh sliramu, supaya ngisi  dhampar prameswari kang isih komplang.

167.   TRUSTI

Pengeran . . .  sapatine kadangku Taruna, atiku isih tatu, mula, salawase aku ora bakal nampa katresnanmu.

168.   PANGERAN DARPA

Aja ngono Trusti, aku tresna marang kowe, ayo timbangana katresnanku

(Gandrung.. telas gendhing dipun tamani pusaka Trusti).

169.   TRUSTI

Iki sing mbok butuhake, iblis ..!!

170.   PANGERAN DARPA

Aaaahhh.....!!! Trusti. . . ora ngira babar pisan yen kowe bakal tegel klawan aku Trusti.

171.   TRUSTI

(taksih nyekel pusaka). Oh. . ora. . ora. . (mlajar).

172.   DEMANG LOSARI

Pengeran,. . . ?? kenging menapa pengeran?

173.   PENGERAN DARPA

Minggir. . !! Ojo nyedak marang aku Losari !! sumingkir. . sumingkir saka papan kene. . .

Trusti. . . Trusti. . . (medal nututi Trusti)

174.   DEMANG LOSARI

(bingung) .. aneh. . ah.. (banjur ngguyu, seneng)

Pangeran cubluk, modara lak wis.. modara kabeh sabrayatmu, ganti aku sing nguwasani Singosari saisine.   ha ha ha...

ADEGAN VI PAPAN                      : TUMAPEL PARAGA      : PENGERAN KAYUN                                                        PENGERAN DARPA                           PATIH PATIH TOYAMERTA                                          RATU SEPUH                           TUMENGGUNG MARTANEGARA                               PRAJURIT                           GARWA PATIH PATIH TOYAMERTA                           TRUSTI                                           WANCI          : ENJANG SUWASANA             : TEGANG

 ISI ADEGAN

Tumapel komplit, dhatengipun Toyamarta, Darpa lan Trusti

ANTAWECANA :

175.   PANGERAN KAYUN

(Wibawa) Martanegara. . .  piye Wartane Singosari?

176.   TMG. MARTANEGARA

Punten dhalem sewu, warta ingkang kula tampi saking prajurit sandi, bilih Singosari ing wekdal menika tansaya bobrok, menapa malih kakang Patih Toyamerta

sagarwanipun kalebetaken dhateng pakunjaran.

177.   PANGERAN KAYUN

(kaget) lajeng lepatipun??. .

(Kedadak Dhatengipun Patih Toyamerta sagarwanipun)

178.   PATIH TOYAMARTA

(mlebet) kula sowan pengeran. .

179.   PENGERAN KAYUN

( pangling ) sapa ya?? Martanegara, sapa iki?

180.   TMG. MARTONEGARA

Lho... menika rak kakang Patih Toyamerta ta sinuwun.

181.   PENGERAN KAYUN

Oh.. paman, mangga. . mangga. .  kula aturi majeng mriki.

182.   RATU SEPUH

Toyamarta. .  kok kaya ngono temen kowe. .

183.   PATIH TOYAMARTA

Inggih, sedaya menika . . .

184.   RATU SEPUH

(nyaut) aja mbok terusake , aku ngerti sapa kang tumindak. Nanging. . .

Kedadak dhatengipun Trusti...

185.   TRUSTI

(mlebet , gugup ) . rama..  ibu . . (ngabruk ibunipun).

186.   PATIH TOYAMARTA

Ana apa Trusti , matura sing cetha !

187.   TRUSTI

Anu rama. . . kan. . jeng. .  pengeran. .Darpa

188.   PENGERAN KAYUN

Pengeran Darpa!!

Kedadak dhatengipun Pangeran Darpa

189.   PENGERAN DARPA

Trusti. . .Trusti. .

190.   PENGERAN KAYUN

(trenyuh ) kang mas, kang mas Darpa. . .

191.   PENGERAN DARPA

Aja cedhak. . .aku dudu kadangmu.

192.   PENGERAN KAYUN

Nanging, penjenengan tatu kang mas. . 

193.   PENGERAN DARPA

Tatu. .aku  tatu? .. . aku ora tatu. . . ! !

194.   RATU SEPUH

Darpa . . oh putraku ngger..

195.   PENGERAN DARPA

Sanes. . .kula sanes putra penjenengan, kula namung manungsa ingkang kebak dosa lan kaluputan.

196.   RATU SEPUH

Ora, ora ngger,. .  kowe ora luput, kabeh mau merga Losari. .

197.   PENGERAN DARPA

Mboten ... losari ugi mboten lepat, jalaran kula ingkang mboten saget uwal saking blenggunipun. Mila ibu. .  dhimas Kayun, paman Toyamarta lan sedaya kemawon, mugi kersa paring pangapura dhateng sedaya dosa kula.

198.   PENGERAN KAYUN

Kang mas, mangga dipun usadani rumiyin tatunipun.

199.   PENGERAN DARPA

Ora. . .ora dhimas . . aku wis ora bakal suwe. .  aku bakal mati. Nanging aku njaluk . . .supaya mati ana ing Trusti . (dhateng Trusti) Trusti. . . kene nyedhaka marang pun kakang yayi. . .  kene Trusti

(sedaya noleh dateng Trusti, toyamarta manthuk, Trusti lajeng maju mangku pengeran darpa).

200.   PENGERAN DARPA

Aku. . .  nja. . luk. . .pa. . mit. . .Trusti (mati)

201.   SEDAYA

(njerit sareng) Darpaaaaaa. .. . .. !!!

............PARIPURNA.........